Nananatiling tiwala ang dalawang Lider ng Kamara na papanigan ng Korte Suprema ang legalidad ng impeachment laban kay Vice President Sara Duterte.
Kasabay nito, muling nilinaw nina House Deputy Majority Leader at La Union Rep. Paolo Ortega V at House Assistant Majority Leader at Zambales Rep. Jay Khonghun na mahigpit ang naging pagsunod ng mababang kapulungan ng kongreso sa due process sa ginawa nitong pag-endorso sa reklamo.
Giit ng dalawang Lider ng Kamara na walang nilabag ang mababang kapulungan sa pagsusulong ng impeachment laban sa Bise Presidente.
Naniniwala rin sina Representatives Khonghun at Ortega na bahagi lamang ng estratehiya ang pagkwestyon o paghamon sa impeachment upang i-antala ang proseso.
Samantala, binalikan ni Cong. Ortega ang naunang hamon ni VP Sara sa kanyang mga kritiko na i-impeach siya, ngunit kalaunan, kinuwestiyon naman ng kanyang kampo sa Korte Suprema ang legalidad ng naturang proseso. —sa panulat ni Kat Gonzales
