Maaaring sibakin ni Pangulong Ferdinand Marcos Jr. si Solicitor General Menardo Guevarra matapos itong tumangging maging kinatawan ng gobyerno sa petisyon sa Korte Suprema kaugnay sa pagkaka-aresto at paglilipat kay dating Pangulong Rodrigo Duterte sa The Hague, Netherlands.
Ayon kay dating Supreme Court Senior Associate Justice Antonio Carpio, ang manifestation of recusal ni Solicitor General Guevarra ay taliwas sa paninindigan ng pamahalaan na ligal at sang-ayon sa Republic Act 9851 ang paghuli sa dating pangulo.
Posible rin aniya itong magbunga ng mas marami pang intriga laban sa administrasyon at iginiit na walang teamwork sa mga gabinete ni Pangulong Marcos.
Matatandaang bago italagang Solicitor General, nagsilbi si Guevarra bilang dating Executive Secretary at Justice Secretary sa ilalim ng administrasyong Duterte. —sa panulat ni Laica Cuevas
