Kumbinsido ang Malacañang na malabong mabigyan ng political asylum si dating Presidential Spokesman Harry Roque sa Netherlands.
Ayon kay Palace Press Officer Undersecretary Claire Castro, hindi basta-basta mapagbibigyan ang hirit ni Atty. Roque dahil mahihirapan itong mapatunayan na mayroong political persecution laban sa kanya sa Pilipinas.
Bago raw kasi ma-grant ang petition para sa asylum, kailangan munang mapatunayan na mayroong well-founded fear of political persecution.
Palaisipan kay Usec. Castro kung paano magkakaroon ng political persecution, kung ang mga ebidensyang nakalap ng Presidential Anti-Organized Crime Commission (PAOCC) laban kay Atty. Roque ay lumutang na lamang sa POGO hub sa Lucky South 99.
Kabilang dito ang bank account at mga dokumento partikular ang contract of lease sa sinasabing Manager ng Lucky South 99.
Samantala, muli namang hinamon ng Palace Official si Atty. Roque na umuwi na lang ng Pilipinas at harapin ang kanyang mga kaso. —sa panulat ni Laica Cuevas mula kay Gilbert {Perdez (Patrol 13)
