Walang balak ang Malacañang na pigilan si dating Senador Leila De Lima na tumestigo sa international criminal court laban kay dating Pangulong Rodrigo Duterte na nahaharap sa kasong crimes against humanity.
Sinabi ni Palace Press Officer Claire Castro, kung boluntaryong magbibigay ng testimonya si De Lima at papayagan ito ng ICC Prosecutors, ay hindi ito tututulan ng pamahalaan.
Nauna nang nagpahayag si De Lima ng kahandaang tumestigo sa kaso ng dating pangulo, sakaling imbitahan ng ICC.
Mababatid na inimbestigahan na rin ni De Lima ang Davao Death Squad noong siya pa ang chairperson ng Commission on Human Rights.
Isa rin siya sa mga naghain ng reklamo sa ICC laban sa sinasabing extrajudicial killings noong administrasyong Duterte.—sa panulat ni John Riz Calata
