Kinuwestiyon ni Presidential Communications Office Undersecretary Claire Castro ang naging pahayag ni Sen. Ronald “bato” Dela Rosa na ikinokonsidera nitong magtago sakaling may lumabas na arrest warrant laban sa senador mula sa International Criminal Court (ICC).
Sa press briefing sa Malacañang, sinabi ni Usec. Castro na nakakapagtaka na ang nasabing pahayag ay binitiwan mismo ng dating hepe ng Philippine National Police.
Dahil dito, tanong ng Palace Press Official kung ito ba ang nais na ipahiwatig ng senador sa taumbayan na kapag may warrant of arrest ay dapat magtago, bagay na hindi aniya sasang-ayunan ng palasyo.
Ayon kay Usec. Castro, hindi makabubuti sa bansa kung mismong mga lider pa ang magpapakita ng kawalan ng respeto sa batas.
Dahil dito, hinimok niya ang mambabatas na harapin ang anumang inihain o ihahaing reklamo.
Dagdag pa ng PCO Official, handa ang pamahalaan na muling makipagtulungan sa interpol sakaling magkaroon ng kautusan para sa pag-aresto sa senador. —sa panulat ni John Riz Calata
