Tututukan na lamang ni Vice President-elect Leni Robredo ang kanyang trabaho bilang Pangalawang Pangulo ng bansa.
Reaksyon ito ni Robredo kasunod ng naging pahayag ni President-elect Rodrigo Duterte na wala pa siyang naiisip sa ngayon kung anong puwesto ang kaniyang ibibigay sa bise president.
Sinabi ni Robredo, kanyang iginagalang ang pagpili ni Duterte sa mga taong bubuo ng kanyang gabinete.
Bilang pangulo aniya, may kapangyarihan ito na mamili ng mga taong sa tingin nito’y makatutulong sa kanya para sa pagpapatakbo ng pamahalaan.
Gayunman, sinabi ni Robredo na may posisyon man o wala, kanyang sisikaping tuparin ang mga binitawan niyang pangako sa mga Pilipino sa abot ng kanyang kakayahan.
By Jaymark Dagala
