Patay ang isang pulis at sugatan ang apat (4) na iba pa nang tamaan ng bombang itinanim umano ng mga miyembro ng Bangsamoro Islamic Freedom Fighters (BIFF) sa Maguindanao.
Ayon sa initial report, ang mga nasabing pulis ay nagpapatrolya nang matiyempuhan ng sumabog na bomba.
Iniimbestigahan na ng mga otoridad ang nasabing pagsabog nitong Linggo, Disyembre 31, 2017 ng 8:00 ng kagabi.
Samantala, posibleng bomb courier ang mga nasugatan sa pagsabog sa Tacurong City bago ang pagsalubong sa Bagong Taon.
Kasunod ito ng pagsabog ng isang hindi pa matiyak na uri ng bomba sa Villa Garden KTV Bar sa Barangay Buenaflor.
Nakilala ang nasawi na si Dominador Datahan, residente ng Barangay Buenaflor sa nasabing lungsod.
Sugatan naman sa insidente sina Aladin Laguiab at Suharto Ali, kapwa mula sa Maguindanao.
Ang mga biktima, ayon kay Sultan Kudarat Police Provincial Director Senior Superintendent Raul Supiter na ang mga sugatan ay sakay ng tricycle na minamaneho ni Datahan mula Tacurong City patungong Isulan, Sultan Kudarat subalit pagsapit sa harap ng Villa Garden KTV Bar ay may biglang sumabog.
Hinala ng mga otoridad may dalang improvised explosive device (IED) ang dalawang (2) pasahero ng tricycle at nadamay lamang ang drayber na si Datahan.
