Sampung taong pagkakakulong ang inihatol sa isa sa dalawang Pinoy na sangkot sa pagkamatay ng isang Pinay sa New Westminster, Canada.
Ayon sa imbestigasyon ng otoridad, Marso noong nakaraang taon nang makita ang sunog na bangkay ng biktimang si Maria Cecilia Loreto, 49 anyos sa Burnaby Park sa nasabing bansa.
Inamin anila ng suspek na si Carlo Castillo Tobias, 22 anyos na inabangan nila si Loreto sa pag-uwi nito sa inuupahang apartment noong March 17, 2021.
Batay sa court record, dalawang beses na sinaksak ng kitchen knife ng isa pang suspek na 15 anyos ang biktima habang ito ay nakahandusay sa sahig.
Binalot din ng mga suspek ng kumot ang katawan ng biktima at dinala sa naturang park para sunugin ito.
Samantala, lumabas na ang menor de edad na suspek ang nakapatay umano sa biktima batay sa medical at autopsy report. – sa panulat ni Airiam Sancho
