Patay ang isang 13-anyos na binatilyo matapos barilin ng riding in tandem sa labas ng kanilang tahanan sa Pasay City.
Ayon kay Rosanna Brondial, ina ng biktimang si Jayross, bigla na lamang nagpaputok ng baril ang gunman na sakay ng motorsiklo kaya siya tumakbo papasok ng kanilang bahay.
Nagulat na lamang aniya siya nang muling lumabas sa kanilang tahanan ay nakitang nakabulagta na ang anak na si Jayross na nakatambay sa labas malapit sa kanilang kapitbahay.
Dagdag pa ni Rosanna, narinig niya pang sumigaw si Jayross na bakit siya ang binaril gayung wala naman siyang kasalanan.
Isinugod pa sa ospital ang 13-anyos na binatilyo pero nasawi rin ito.
Narekober naman ng pulisya ang anim bala ng kwarenta’y singkong baril sa lugar ng krimen habang patuloy na iniimbestigahan ang motibo sa pamamaril.
—-
