TULUYANG naharang ng nangungunang digital solutions platform Globe ang isa pang record-high na fraud-linked SIMs sa unang siyam na buwan ng taon via Stop Spam reporting portal nito.
Nabatid na naobserbahan ng telco ang biglang pagtaas sa bilang ng SIMs mula sa ibang networks na ginamit sa spam at scam activities.
Ayon sa Globe, may kabuuang 154,569 SIMs ang na-block nila sa unang siyam na buwan, kabilang ang 148,515 mula sa ibang networks na na-blacklist, at 6,054 mula sa sarili nitong network na na-deactivate.
Kapansin-pansin umano na malaki ang itinaas nito mula sa kabuuang 35,558 blacklisted at deactivated SIMs sa kaparehong panahon noong nakaraang taon.
Sinasabing tumaas ang blacklisted SIMs–na kinabibilangan ng mga numero mula sa ibang networks– ngayong taon na may 148,515 hanggang noong katapusan ng Setyembre, mas mataas ng mahigit 667.8% kumpara sa kaparehong panahon noong nakaraang taon sa 19,343.
Kasabay nito, natuklasan na bumaba ang bilang ng Globe SIMs na na-deactivate dahil sa fraud links, mula 16,215 sa unang siyam na buwan ng 2022, sa 6,054 sa kaparehong panahon, na 62.66% pagbaba.
“With our proactive efforts via our Stop Spam portal bolstered by the SIM Registration Law, we were able to block a new record high in SIMs linked to fraud. Through collaboration and use of technology, we are gaining headway against these criminals,” pahayag ni Anton Bonifacio, Chief Information Security Officer ng telco.
Napag-alaman na nag-invest ng malaki ang Globe sa state-of-the-art systems para sa pagtukoy at pagharang ng spam. Gumasta ito ng US$20 million sa Security Operations Center nito, na nagtatrabaho round-the-clock para salain ang unwanted messages, kabilang ang app-to-person at person-to-person SMS mula sa international at domestic sources.
Nanawagan naman ang telco sa mga customer na patuloy na i-report ang mga kahina-hinalang mensahe mula sa unknown senders sa kanilang #StopSPAM portal.
