Patay ang dalawang bata habang tatlo ang sugatan matapos mahulog ang sinasakyan nila sa bangin sa Bontoc, Mountain Province.
Kinilala ng Bontoc Police ang mga nasawi na sina Fausto Querido Ballakis Jr, 11- taong gulang at Nathan James Oloan Ballakis, apat na taon.
Patuloy namang inoobserbahan sa ospital ang mga nasugatan na sina Jeranie Querido Ballakis, 50-anyos, Fausto Langagan Ballakis, Sr., 51- anyos at Fernan Querido Ballakis, 18- anyos, na siyang nagmaneho ng sasakyan.
Sa imbestigasyon ng pulisya, binabaybay ng mga biktima sakay ng Tamaraw FX ang bahagi ng Barangay Gonogon pasado alas-10 ng gabi noong Huwebes.
Pero nakatulog ang drayber na naging dahilan para dumiretso at mahulog ang sasakyan sa may 25 hanggang 30 meters lalim na bangin.
Nagtulong-tulong pa ang mga pulis, bumbero, residente at iba pang volunteer rescuers para ma-iahon ang mga biktima na agad isinugod sa ospital, pero idineklarang dead on arrival ang dalawang bata.
Nagpaabot naman ng tulong ang lokal na pamahalaan ng Bontoc sa mga biktima.
