Patay ang 2 hinihinalang miyembro ng teroristang grupong Ansar Al Khalifa Philippines makaraang maka-engkwentro ang mga awtoridad sa Barangay Daliao sa lalawigan ng Sarangani.
Ang AKP ay sinasabing kaalyado ng International Terrorist Group na Islamic State of Iraq and Syria o ISIS.
Ayon kay Sarangani Police Director, Senior Superintendent Joseph Semillano, nakasagupa ng tropa ng PNP Regional Special Investigation and Detection Team, Special Action Force Region 12 Public Safety Batallion at Sarangani Police Provincial Office ang grupong pinangungunahan ng isang Mohammad Jaafar Sabiwang Maguid alyas Tokboy.
Gayunman, nagawang makatakas ng Maguid habang nasa kalagitnaan ng bakbakan.
Wala namang napaulat na nasaktan sa hanay ng gobyerno kaugnay ng nangyaring engkwentro.
By Ralph Obina
