Dalawang (2) magsasakang Lumad ang bihag ng Bangsamoro Islamic Freedom Fighters o BIFF sa bayan ng Datu Hofer, Maguindanao.
Ayon kay Maguindanao Provincial Police Office Chief, Senior Superintendent Agustin Tello, patungo na sana ang anim (6) na miyembro ng tribong Teduday sa kanilang mga sakahan sa Barangay Limpongo nang harangin ng mga bandido.
Kinilala ang mga ito na sina Kannie Minggil, Mael Minggil, Elvin Minggil, Uzik Labina, Kew Mintos at Kong Mintos.
Naganap ang insidente sa gitna ng pinaigting na military operations laban sa Islamic State – inspired BIFF simula noong Pasko.
Gayunman, nakatakas ang magkakapatid na Minggil maging si Labina habang nagpapahinga ang mga bandido matapos ang ilang oras na pagtatago mula sa mga tumutugis na miyembro ng 57th Infantry Battalion.
Samantala, dalawang (2) bangkay ng lalaki ang nadiskubre sa Barangay Kabintog subalit hindi pa matiyak kung ang mga ito ay ang magkapatid na Mintos.
