Dalawa ang patay habang 38 ang sugatan makaraang mahulog sa bangin ang isang bus sa bayan ng Magsaysay, Occidental Mindoro.
Kinilala ang mga nasawi na sina Jonathan Piñada, 51 taong gulang, campus director ng University of Rizal System-Binangonan, Rizal at Elmer Dacillo, 52 taon at sports director mula sa nasabing paaralan.
Ayon kay Magsaysay Municipal Police Officer-in-Charge, Senior Insp. Joselito Sape, dakong ala 6:30 kagabi nang maganap ang trahedya sa matarik na bahagi ng Sitio Bunga, Barangay Nicolas.
Dadalo sana sa Southern Tagalog Region Association of State Universities & Colleges Olympics (STRASUC OLYMPICS 2017) sa bayan ng San Jose ang mga biktima na kinabibilangan ng mga guro at estudyante lulan ng bus at coaster van.
Nawalan anya ng preno ang Charms Aloha Travel Bus na may plakang RMJ-324 habang pababa ng bundok kaya’t kumaliwa ito upang hindi mabangga ang coaster dahilan upang mahulog naman sa bangin na may lalim na sampung talampakan.
Dinala naman ang mga sugatan sa San Jose District Hospital.
Samantala, pinaghahanap na ang driver ng bus habang nakikipag-ugnayan na ang mga opisyal ng U.R.S. Sa mga magulang ng mga estudyante.
via Mariboy Ysibido (DWIZ MIMAROPA Correspondent)
Photo Courtesy of Ms. Kristie Daclis
