Nasawi ang 26-anyos na lalaking nag-amok sa loob ng isang mall sa lalawigan ng Davao Del Norte, Tagum City.
Kinilala ang suspek na si Jayson Torreda.
Batay sa imbestigasyon, biglang nag-amok sa ikatlong palapag ng mall ang suspek matapos nitong kunin ang kutsilyo mula sa mga display.
Bigla umano nitong tinaga sa ulo ang promodizer na si Sherwin Bustamante, 23-anyos at ang security officer ng mall na si Ronald Costan, 45-anyos.
Ayon sa ama ng suspek, nakararanas si Torreda ng depresyon dahil sa timbang nito kung saan kahit ano aniyang ehersisyo at pagbabawas ng pagkain ay hindi ito pumapayat.
Hindi naman sumuko ang suspek, sa halip ay patuloy itong nag-ikot sa nasabing palapag bitbit ang kutsilyo.
Dahil dito, napilitan ang mga pulis na barilin si Torreda na dahilan ng kanyang agarang pagkasawi.
Patuloy namang nilalapatan ng lunas ang nasabing dalawang biktima.—sa panulat ni Airiam Sancho
