Patay ang dalawang sundalo at sampung Abu Sayyaf members matapos magka-engkwentro sa Patikul Sulu kaninang umaga.
Ayon kay Joint Task Force Sulu Brigadier General Cirilito Sobejana, nagsasagawa ng operasyon ang mga sundalo mula sa 5th Scout Ranger Battalion nang makasagupa ang Abu Sayyaf Groups na pinamumunuan nina Sub Leaders Hajan Sawadjaan, Injam Yadah at Ben Quirino sa Sitio Kan Alas Barangay Tanum.
Aniya, tumagal ng halos isang oras ang bakbakan bago nagsitakas ang mga kalabang Abu Sayyaf.
Tumanggi muna si Sobejana na pangalanan ang dalawang nasawing sundalo habang hindi pa naipapaalam sa mga kaanak ng mga ito.
Habang kinilala naman ang apat sa sampung nasabing Abu Sayyaf members na sina Amah Talah, Taha Sawadjaan at mga alyas Red at Long Abraham.
Samantala, nagpapatuloy naman ang clearing at pursuit operations ng militar sa mga nakatakas na miyembro ng Abu Sayyaf na pinaniniwalaang may hawak ng mga bihag kabilang ang dalawang babaeng pulis.
—-
