Umapela ang Jail Warden ng Manila City Jail female dorm na paikliin ang 3-day furlough o leave na ipinagkaloob sa nakapiit na aktibista na si Reina Mae Nasino para mabisita nito ang kaniyang namayapang 3 buwang gulang na anak.
Batay sa liham ni Jail Inspector Ignacia Monteron, inapela nito ang pagpagpapaikli sa leave period na ipinagkaloob kay Nasino dahil sa kakulangan sa tao.
Sa halip aniyang 3 araw na magkakasunod hanggang sa mailibing ang bata, mas makabubuti sana kung payagan na lamang si Nasino na bumisita ng Huwebes, Oktubre 14 mula alas-8 ng umaga hanggang alas-3 ng hapon at sa libing ng anak nito mismo sa Biyernes, Oktubre 16.
Nabatid na walang representative mula sa BJMP sa Manila City Jail ang present sa ginanap na pagdinig kung saan napagkalooban ng 3-day leave si Nasino.
