Patay sa shootout ang tatlong (3) hinihinalang holdaper makaraang maka-engkwentro ng mga pulis sa Buendia Avenue, Makati City.
Kinilala ang dalawa sa tatlong napatay na suspek na sina Jason Brondial at Yuki Rivera na sinasabing lider ng grupo.
Ayon kay Sr. Supt. Tomas Apolinario, Director ng Southern Police District, mayroon silang nakuhang impormasyon na mayroong nakawan sa lugar at agad nilang tinimbrehan ang mga pulis sa paligid.
Nagsagawa aniya ng checkpoint ang mga pulis sa kahabaan ng Chino Roces Avenue at nang dumaan ang mga naturang suspek, sinita ang mga ito at sa halip na huminto ay nakipagputukan pa ito ng baril sa mga awtoridad.
Kabilang sa mga narekober mula sa tatlong (3) suspek ang walong (8) cellphones, isang 9MM pistol, isang .38 revolver at P30,000 cash.
Hinala ng pulisya, ang mga naturang suspek ang siyang responsable sa nangyaring panloloob sa isang spa shop sa Chino Roces Avenue kahapon at sa isang restaurant sa Barangay Poblacion noong Enero 28.
By Meann Tanbio | Report from: Jopel Pelenio (Patrol 17)
