(Report and Photo/ Gilbert Perdez)
Tatlo katao ang kumpirmadong patay matapos na sumiklab ang sunog sa isang printing press sa Recto, Quiapo Maynila kaninang pasado alas-4:00 ng madaling araw.
Kinilala ang mga biktima na sina Ronald Obiedo, Benjie Solis at Joel Eva.
Ayon kay SFO3 Sonny Lacuban imbestigador ng Bureau of Fire Protection o BFP, na-trap sa loob sina Obiedo at Solis habang dead on arrival naman sa ospital si Eva.
Sinasabing katatapos lang ng party nang maganap ang sunog sa unang palapag ng establisyimento na tumagal ng halos isang oras bago tuluyang naapula.
Ayon sa BFP, faulty electrical wiring ang tinitignang sanhi ng sunog habang patuloy na inaalam ang kabuuang halaga ng mga napinsalang ari-arian.
—-
