Patay ang tatlong miyembro ng New People’s Army matapos makasagupa ang tropa ng pamahalaan sa Makilala , Cotabato City kaninang umaga.
Ayon kay Lt. Col. Rhojun Rosales , commander ng 39th infantry battalion ng Philippine Army, inatake ng mga rebelde ang ‘detachment’ ng CAFGU sa Barangay Luayon kung saan nakapalitan nila ng putok ang mga sundalo na rumesponde.
Maliban sa mga NPA , kabilang din sa nasawi ang isang miyembro ng CAFGU o Citizens Armed Forces Geographical Unit.
Tumanggi naman ang militar na pangalanan ang nasawing CAFGU member dahil hindi pa anila nakakarating ang impormasyon sa pamilya nito.
Sa ngayon ay dinala na ang mga narekober na bangkay sa isang punerarya sa bayan ng Makilala.
