Inaabisuhan ng Manila International Airport Authority (MIAA) ang lahat ng mga pasaherong magtutungo sa Abu Dhabi, Dubai, Hong Kong at South Korea na sumailalim muna sa COVID-19 RT-PCR test.
Ayon sa MIAA, ito ay dahil humihingi ang nabanggit na apat na international destinations ng certication o kopya ng negatibong resulta ng RT-PCR test sa lahat ng mga pasaherong magmumula sa Pilipinas.
Dagdag ng MIAA, posibleng hindi payagang mag-check in sa kanilang flights ang mga pasaherong walang maipakikitang certification mula sa mga accredited testing institutions kahit pa may kumpirmadong bookings.
Kasunod nito, pinapayuhan ng MIAA ang lahat ng mga apektadong pasahero na makipag-ugnayan sa kanilang mga airlines hinggil sa detalye para sa pagpapatupad ng nabanggit na regulasyon.
