Aabot sa 44 na baboy ang patay matapos tumagilid ang 14-wheeler truck kung saan lulan ang mga ito sa Navotas City.
Ayon sa mga awtoridad, papaliko ang naturang truck sa kanto ng C3 at Road 10 nang bigla itong tumagilid.
Dito nasawi ang mga baboy na nadaganan habang nakawala naman ang iba na hinabol naman ng mga taong nakatambay sa lugar.
Maswerte namang nakaligtas sa aksidente ang driver at mga kasamang pahinante nito.
Nasa 160 umanong buhay na baboy ang karga ng truck na mula pa sa General Santos at dadalhin sana sa slaughterhouse sa Cavite.
Ayon sa middleman na sumaklolo, nasa P25,000 ang presyo ng bawat baboy kaya naman nasa P1-milyon ang agad nawala sa supplier nito.
