Limang (5) hinihinalang motor-napper ang patay nang maka-engkuwentro ng mga pulis sa bayan ng Muñoz, lalawigan ng Nueva Ecija.
Ayon kay Police Supt. Ponciano Zafra, Chief of Police ng Muñoz PNP, nangyari ang insidente dakong alas-3:00 kaninang madaling araw.
Nagsasagawa sila ng checkpoint nang dumating ang 5 suspek ngunit sa halip na huminto, umabante pa ang mga ito at pinaputukan ang mga pulis dahilan para gumanti ang mga ito.
Nakilala naman ang dalawa sa mga suspek na sina Harvey Igma na taga-Gagalangin Tondo at isang Alfred Carira na taga-Northbay Blvd. Navotas batay sa nakitang identification card sa mga ito.
Una rito, nakatanggap sila ng timbre mula sa PNP Nueva Ecija provincial office na isang tricycle driver at barangay tanod na nagngangalang Macario dela Cruz ang naging biktima ng pagnanakaw ng tricycle.
Masuwerte namang walang nasugatan sa panig ng pulisya.
By Jaymark Dagala
