5 miyembro ng isang pamilya ang nasawi kabilang na ang labing 4 na taong gulang na batang lalaki habang 8 buwang gulang na sanggol din ang nasugatan matapos salakayin ng mga armadong lalaki ang kanilang bahay sa North-Central Mexico.
Ayon sa mga otoridad, ang mga sumalakay sa mga nasawing pamilya ay kinilalang miyembro ng drug gang base narin sa nakuhang sulat mula sa loob ng bahay ng mga biktima kung saan, 3 babae, 1 lalaki at 1 bata ang natagpuang wala nang buhay matapos pagbabarilin.
Samantala, dinala naman sa ospital ang sugatang sanggol na patuloy pang ginagamot matapos tamaan ng bala ng baril sa braso.
Bukod sa mga biktima, mayroon pa umanong natagpuang 3 lalaki at 1 babae na wala nang buhay malapit sa lugar kung saan, nakita din ang ilang mga plastic bags na puno ng methamphetamine o iligal na droga.
Iniimbestigahan na ngayon ng mga otoridad, ang motibo ng mga armadong lalaki sa ginawang pamamaslang. —sa panulat ni Angelica Doctolero
