Pitong miyembro ng MILF o Moro Islamic Liberation Front ang patay matapos makasagupa ang ilang miyembro ng ISIS-inspired terror group na Dawlah Islamiya sa Maguindanao.
Kinilala ni Army’s 57th Infantry Battalion Commander Lt/Col. Ernesto Gener ang mga nasawi na sina Laguiali Ali, Poangan Ganda, Kho Mamaluba, Jeomar Salansamen, Mads Maitem, Tongan Tot at Datumaniot Musbil.
Ayon kay Gener, tumagal ng halos kalahating araw ang engkwentro ng MILF sa grupo ni Dawlah Islamiya Leader Salahuddin Hassan sa Sitio Tinulusan, Dasawao 4 sa Shariff Saydona na sumiklab noong Biyernes ng umaga.
Una nang itinanggi ng BIFF o Bangsamoro Islamic Freedom Fighters na may kinalaman sila sa nangyaring engkuwentro kahit pa minsan na silang nagpakita ng alyansa sa international terror group na ISIS.
