Nilinaw ng Armed Forces of the Philippines (AFP) na hindi pa patay ang lider ng Abu Sayyaf Group na si Furiji Indama.
Binawi ni AFP Spokesman Brigadier General Restituto Padilla ang una nilang ulat na patay na si Indama.
Si Indama ang napaulat na ika-25 Abu Sayyaf na namatay sa pakikipagbakbakan sa militar sa Basilan noong Sabado.
Pero kinalaunan, nakumpirmang hindi pa ito patay; bagkus, nasa kritikal na kondisyon pa rin matapos mapuruhan.
Samakatuwid, 24 lamang na miyembro ng Abu Sayyaf ang napaslang sa bakbakan.
Samantala, humingi ng paumanhin si Padilla sa maling ulat na nangyari, aniya, dahil sa mabilisang pagpapasa ng impormasyon mula sa ground.
Sinusuri pa sa ngayon ng militar ang mga impormasyon na kanilang natatanggap kaugnay sa patuloy na military operation sa Basilan.
By Avee Devierte | Jonathan Andal (Patrol 31)
