Tiniyak ng Armed Forces of the Philippines (AFP) na nakahanda silang ipagtanggol ang mga Pilipino sa anumang banta ng digmaan.
Kasunod ito ng nagpapatuloy na tensyon sa pagitan ng Amerika at mga bansa sa gitnang silangan.
Ayon kay AFP Chief of Staff Lt. General Filemon Santos Jr., naitala na sa kasaysayan na nadadamay sa digmaan ang mga bansang kaalyado partikular ng Estados Unidos.
Gayunman, nilinaw ni Santos na bagama’t kaalyado ng Pilipinas ang Estado Unidos, hindi kasama sa RP-US mutual defense treaty ang giyera sa gitnang silangan.
Dagdag ni Santos, nagbibigay lamang ng update sa sitwasyon ang Estados Unidos pero wala pang inilalatag na plano sa posibleng mangyari sa gitnang silangan.
Sa ngayon, ang pangunahing alalahanin aniya ng Pangulo ay ang kaligtasan ng lahat ng mga Pilipino sa gitnang silangan at naghihintay lamang ang AFP ng go signal para sa paglikas ng mga Pilipinong nanganganib maipit sa giyera. — ulat mula kay Jaymark Dagala (Patrol 9)
