Himas rehas ang aktor na si Baron Geisler matapos arestuhin ng awtoridad dahil umano sa panggugulo sa isang restaurant sa Tomas Morato, Quezon City.
Ayon kay Superintendent Christian Dela Cruz, hepe ng Quezon City Police District o QCPD Station 10, mga kasong unjust vexation at alarm and scandal ang posibleng isampa sa aktor matapos ang binabanggit na pagtulak at pagmumura nito sa gwardya ng nasabing restaurant.
Depensa naman ni Geisler, tahimik lamang siyang umiinom kasama ang kanyang mga kaibigan nang bigla siyang ipadampot ng guwardya at general manager ng naturang restaurant at idineresto sa istasyon ng pulis.
Hamon pa ng aktor, i-review ang CCTV ng restaurant upang malaman kung sino ang nagsasabi ng totoo.
Nakikipagtulungan naman na ang mga awtoridad sa restaurant upang makuha ang CCTV, habang nakatakdang isailalim sa inquest proceedings si Geisler ngayong umaga.
