Dumating na sa Davao City ang dalawang (2) American expert na kinuha ng pamunuan ng NCCC para magsagawa ng independent investigation sa nangyaring sunog sa nasabing mall noong Disyembre.
Ayon kay Inter-Agency Anti-Arson Task Force (IAATF) Spokesman Senior Superintendent Jerry Candido, nagtungo na sa kanyang tanggapan ang dalawang American investigators para mag-courtesy call.
Ipinabatid din aniya ng dalawang American investigators ang kanilang pagnanais na makipag-ugnayan sa mga lokal na opisyal ng Bureau of Fire Protection (BFP) para sa kanilang isasagawang pagsisiyasat sa insidente ng sunog.
Kasabay nito nagtalaga din si Candido ng mga tauhan na tutulong sa dalawang dayuhang imbestigador.
Una nang inihayag ng IAATF na kanilang nakitaan ng paglabag sa fire safety and security regulations ang NCCC Mall at ang contact center company na Survey Sampling International na nakapagpalala sa insidente.
