Patay sa pamamaril ang anak ng isang Kongresista kasama ang aide nito sa Cagayan de Oro City, mag-aalas 2 ng hapon nitong Huwebes (Nobyembre a-11).
Ayon sa impormasyong ipinarating ng Cagayan de Oro City Police Office sa Kampo Crame, kinilala ang mga biktima na sina Roland Sherwin Uy, 45 anyos at Samuel Pabalan, 73 anyos.
Batay sa salaysay ng driver ni Uy na si Rubi Alayuay, nasa loob lamang siya ng palikuran sa bahagi ng Zone 1, Brgy. Pagatpat nang marinig niyang nakikipag-usap si Uy sa hindi nakilalang lalaking di umano’y nag-aalok ng buhangin at graba.
Sumunod nito ay nakaranig na siya ng mga putok ng baril kaya’t dahil sa takot ay hindi na niya nagawa pang lumabas ng palikuran at narinig niyang may kumakaripas na motorsiko papalayo sa lugar na pinangyarihan ng krimen.
Ang biktimang si Uy ay kasalukuyang konsehal ng Barangay Carmen at anak ni Cagayan de Oro City 1st District Rep. Rolando Uy.
Patuloy ang ginagawang imbestigasyon ng mga awtoridad sa insidente habang tinutugis din ang mga hindi pa tukoy na salarin.
