Kinilala ang katapatan ng isang lalaking janitor sa isang pribadong ospital sa Dagupan City sa Pangasinan.
Ito’y makaraang ibalik ng tapat na janitor ang isang bag na naglalaman ng salaping nagkakahalaga ng Isang Milyong Piso sa may-ari nito.
Ayon sa 38 anyos na si Reynaldo Padilla, nakita niya ang backpack sa cabinet ng isa sa mga silid sa loob ng ospital.
Hindi nagdalawang isip si Padilla na ipagbigay alam iyon sa kaniyang mga amo kaya’t agad silang nakipag-ugnayan sa may-ari para maibalik iyon.
Tumanggi nang magpakilala ang may-ari ng backpack, pero sinabi nito na pampasuweldo sana sa kaniyang mga tauhan ang naturang pera na natagpuan ni Padilla.
Dahil sa katapatang ipinakita ni Padilla, binigyan siya ng may-ari ng backpack ng Sampung libong Piso bilang pabuya.
