Kinasuhan ng mga kaanak ng dalawang SAF commando na nasawi sa Mamasapano encounter ang dating Pangulong Benigno Aquino III.
Isang araw ito matapos bumaba sa puwesto ang dating pangulo at mawalan ng immunity mula sa mga kaso.
Kasama ang ilang opisyal ng Volunteers Against Crime and Corruption (VACC), naghain ng multiple homicide case sina Erlina Alliage, ina ng nasawing PO3 Robert Alliaga at Warlito Mejia, ama naman ni PO2 Ephraim Mejia.
Iginigiit ng mga complainant na dapat panagutin si Aquino sa pagkasawi ng 44 na SAF commandos.
Ayon kay Atty. Ferdinand Topacio, abogado ng mga complainant, pinapanagot din nila sa pumalpak na Oplan Exodus sina dating PNP Chief Alan Purisima at dating PNP Special Action Force Director Getulio Napeñas Jr.
By Judith Larino | Jill Resontoc (Patrol 7)
