Agustina Nolasco

Pinasisiguro ni Senator Pia Cayetano kung may sapat na pondo ba sakaling maaprubahan ang panukalang batas na dagdag teaching supplies allowance sa mga guro sa pampublikong paaralan.

Ayon kay Cayetano, isa ito sa mga dapat tiyakin upang hindi umasa sa wala ang mga guro.

Paliwanag ng senadora ang dagdag allowance kasi ay nangangahulugan din ng mas malaking pondo sa ilalim ng taunang general appropriations act.

Gayong sa ilalim ng naturang Senate Bill no. 1964, o ‘Kabalikat sa Pagtuturo Act’ mula sa dating limang libong pisong allowance isinusulong na maging sampung libong piso ito.

Siniguro ng Department of Health (DOH) na may kakayanan ang bansa na pigilan ang pagkalat ng monkeypox.

Gayunman, ayon sa ahensya  maglalagay pa rin ng karagdagang proteksyon gaya ng  pagsusuot ng facemask, pag-isolate kapag may nararamdamang sintomas at paghuhugas ng kamay.

Nabatid na kabilang sa sintomas na mayroong monkeypox ay ang lagnat, pamamantal at kulani.

Apat na indibidwal pa ang nawawala matapos lumubog ang isang dive yacht sa Tubbataha, Palawan kaninang umaga.

Sa pinakahuling ulat ng Philippine Coast Guard (PCG) mag-aala syete ng umaga kanina nang makatanggap ang PCG Command Center ng ulat mula sa Coast Guard District Palawan kaugnay sa nangyaring paglubog sa M/Y Dream Keeper.

Habang 28 kataong sakay ng naturang yate ang nasagip at patuloy pa rin ang isinasagawang search and rescue operations.

Nabatid na umalis ang  M/Y Dream Keeper mula sa San Remegio, Cebu City alas-4 ng hapon nitong Huwebes at dumating sa Tubbataha Reef bandang 10 p.m. nitong Sabado.

Handa ang Armed Forces of the Philippines (AFP) na ipagtanggol ang Pilipinas sa loob ng tatlo hanggang limang sa tulong ng Amerika.

Ito’y ayon kay Philippine Ambassador to Washington Jose Manuel Romualdez.

Aniya,  mas sanay at handa ang mga Pilipinong sundalo ngayon kumpara noon gayong katatapos lamang ng balikatan exercises sa pagitan ng bansa at ng US.

Dagdag pa nito, lumalakas na rin ngayon ang pwersa ng Pilipinas dahil sa mga helicopter at iba pang kagamitan na mula sa Amerika.

Inihayag ni House Deputy Speaker at Batanggas Representative Ralph Recto na hindi kawalan ng pondo ang dahilan ng kakulangan sa plastic ID cards para sa drivers license ng Land Tranportation Office (LTO).

Ayon sa mambabatas, bunga ng kakulangan o kawalan ng diskrate at sablay na pagpaplano sanhi ng kasalukuyang problemang kinahaharap ng ahensya.

Paliwanag pa ni Recto, katumabas lang ng higit tatlong araw na kita ng LTO ang 249 million pesos na kailangang pondo para sa 5.2 million piraso ng nasabing ID cards.

Giit pa nito na kalokohan na may problema ang bansa sa plastic para sa pag-imprenta ng lisensya dahil ikatlo ang bansa sa buong mundo na pinagmumulan ng marine plastic solution.

Inatasan ni Senator Grace Poe ang Land Transportation Office (LTO) na  isapubliko ng kumpletong ulat nito kaugnay  sa problema ng backlog sa mga plaka at lisensya.

Ayon sa senadora ito’y upang malinawan ang publiko at malaman ang  impormasyon ukol sa  isyu na kinakaharap ng lto ngayon.

Aniya, nagkakaroon na ng “notorious” na reputasyon na palpak ang LTO sa paghahatid ng serbisyo sa publiko.

Giit ni Poe, di na pwede na ang band-aid at D-I-Y na solusyon at dapat ang  mahusay na pagpaplano at pag-estimate ng LTO upang hindi ito kinukulang ng mga suplay na kailangan sa pagseserbisyo.

Hinikayat ng Estados Unidos ang Tsina na itigil na ang pagsasagawa ng mapanghamon at hindi ligtas na hakbang sa West Philippine Sea.

Kaugnay ito sa naging insidente sa pagitan ng Philippine Coast Guard at China na anila’y isang pangha-harass at intimidasyon sa barko ng bansa.

Kasabay nito tiniyak ng US na sa panig ito ng Pilipinas sa harap ng patuloy na paglabag ng Chinese Coast Guard sa kalayaan ng paglalayag sa South China Sea.

Aabot sa 12,400 na mga tauhan ng National Capital Region Police Office (NCRPO) ang ipinakalat simula ngayong araw bilang paghahanda sa selebrasyon ng Labor Day bukas.

Ayon kay Ncrpo spokesperson PLt. Col. Luisito Andaya Jr., karamihan sa mga tatauhan ng pulisya ay ang mga lugar na inaasahang may isasagawang pagtitipon at sa mga pangunahing kalsada sa Metro Manila.

Gayundin sa mga terminal dahil inaasahan na may ilang magbabakasyon bunsod ng long weekend.

Ito’y upang matiyak aniya ang police visibility sa mga lugar at upang agad na makaresponde ang pulisya sakaling kailanganin ang tulong nito.

Umabot na sa P6.9-M ang halaga ng humanitarian assistance na naipaabot sa mga naaapektuhan ng bagyong Amang mula sa Department of Social Welfare and Development (DSWD) at Local Government Units (LGU).

Kabilang sa mga lugar na naabutan ng tulong ay ang Mimaropa, Oriental Mindoro, Occidental Mindoro, Marinduque, Romblon, Palawan, Bicol region, at Davao region.

Habang sa ngayon ay may 119 na pamilyang napalikas na dahil sa nasabing bagyo o katumbas ng 435 na indibidwal na nananatili sa 18 evacuation centers.

Samantala, 48 pamilya, o katumbas ng 163 indibidwal naman, ang nananatili sa labas ng mga evacuation center at  pansamantalang nanirahan sa kanilang mga kaibigan o kamag-anak.