Agustina Nolasco

Iminungkahi ni Senador Robin Padilla na pwedeng gawing modelo o tularan ng Pilipinas ang implementasyon ng medical marijuana sa Israel.

Kasunod ito ng ginawang study tour ng Senador kamakailan kasama ang kanyang technical team.

Aniya  isa ang Israel sa mga bansang may pinakamaayos at pinakamalinaw na batas at panuntunan sa paggamit ng medical cannabis.

Mahigpit din aniya ang naturang bansa sa implementasyon ng batas sa mga mang-aabuso sa paggamit ng naturang gamot.

Bunsod nito, plano ni Padilla na ipanukala ang natuklasang ideya.

Asahan na ang panibagong pagsipa sa produktong petrolyo sa susunod na Linggo.

Batay sa ulat ng mga kumpanya ng langis P1.90 hanggang P2.00 ang posibleng itaas ng diesel at gasoline.

Habang ang mula P1.70 hanggang P1.90 kada litro naman ang inaasahang itataas ng presyo ng kerosene.

Nabatid na sa ngayong P55 kada litro ng average na presyo ng petrolyo sa NCR bunsod ng kaguluhan sa Russia at Ukraine.

‘Hindi pa huli ang lahat para makapag-aral’

 Ito ang pinatunayan ng18 mga magulang na edad 25 hanggang 56 na nagtapos ng kindergarten sa Tabunan Elementary School sa Malita, Davao Occidental.

Ang mga naturang nagsipagtapos ay miyembro ng lokal na tribong tagakaulo na mga hindi nakapag-aral dahil sa hirap ng buhay at layo ng paaralan sa kanilang mga tahanan.

Ayon kay Romnick Masayao Class Adviser ng mga nagsipagtapos, ito ang kauna-unahang pagkatataon na tumanggap ang paaralan ng parent-pupil learning na inisyatiba ng isa sa kanilang mga guro.

Ilan aniya sa mga nagsipagtapos ay walang suportang nakukuha sa kanilang mga magulang noon na makapag-aral kaya’t mas ginusto nilang mag-asawa na lamang.

Giit ng guro hindi hadlang ang edad sa pag-aaral at laging bukas ang paaralan sa mga nais matuto.

Inilunsad ni Pangulong Ferdinand R. Marcos jr. ang bagong brand of governance at leadership campaign ng kanyang administrasyon ang ‘Bagong Pilipinas’ na magsisilbing tema ng pamahalaan sa ilalim ng kanyang pamumuno.

Layunin ng naturang kampanya na mapalalim at magkaroon ng mahalagang transpormasyon ang lahat ng sektor.

Ayon kay Communications Secretary Cheloy Velicaria-Garafil, sa pamamagitan ng bagong kampanya ay paiigtingin ang pangako ng pamahalaan tungo  sa komprehensibong reporma sa pulisiya at pagbangon ng ekonomiya ng piipinas.

Kung saan lahat ng ahensya ng Gobyerno, GOCCs, Pamantasan, Kolehiyo o Unibersidad , ay inatasang ipatupad  ang Bagong Pilipinas campaign sa kanilang mga programa, mga proyekto at aktibidad.

Kasabay nito inaprubahan na  rin ang gagamiting logo ng Bagong Pilipinas na ipinagagamit sa mga websites, officials letters, social media at iba pang dokumento.

Ginawaran ng “Dayaw Ti Agimanman Silnag Award,” ang Department of Labor and Employment (DOLE) Region 1 isang prestihiyosong parangal na iginagawad sa natatanging ahensya ng pamahalaan.

Ang parangal ay mula sa salitang Iloko na Silnag na nangangahulugang Shine” habang ang Dayaw Ti Agimanman ay nangangahulugan namang “Honor of Leadership”.

Mula ang parangal sa National Economic and Development Authority (NEDA) Region 1 at Regional Development Council (RDC) Region 1.

Kaugnay nito tiniyak ng kagawaran na lalo pang pagpabubutihin ang kanilang mga programa at serbisyo na ipinagkakaloob sa publiko.

Matatandaang 13 ahensiya ng pamahalaan ang sumali sa nasabing patimpalak.

Hinkayat na rin ng Water Resources Management Office ng Department of Environment and Natural Resources (WRMO-DENR) ang lahat ng  residente ng National Capital Region (NCR) at kalapit nitong lalawigan na makiisa sa pagtitipid ng tubig.

Gaya na lamang sa pagdidilig ng halaman at paghuhugas ng sasakyan.

Kasabay nito hinimok ng WRMO ang lahat ng Local Government Units (LGUs) sa NCR na agarang aprubahan ang pagsasaayos sa mga pipe ng water concessionaires na Manila Water at Maynilad.

Pati na rin ng paghikayat sa mga residente na mag-ipon ng tubig-ulan at paggamit ng pinagbanlawang tubig sa pagdidilig ng halaman.

Matatandaang una nang naglabas ng panuntunan ang WRMO sa lahat ng opisina ng gobyerno na magtipid ng tubig ngayong panahon ng tagtuyot.

Lumagda sa isang Memorandum of Agreement ang Department of Human Settlements and Urban Development (DHSUD) at Philippine Coast Guard (PCG) upang isama ang mga tauhan ng PCG sa priority-beneficiaries ng pambansang pabahay para sa Pilipino Program ng Pangulong Bongbong Marcos Jr.

Ayon kay DHSUD Secretary Jose Rizalino Acuzar, ang kasunduan sa PCG ay batay sa direktiba ng Pangulo na isama ang mga uniformed personnel sa mga prayoridad sa programa.

Kung saan nasa 2K tauhan ng PCG ang inaasahang makakasama sa  benepisyaryo ng pabahay program ng gobyerno.

Samantala bukod sa PCG, tinitingnan din ng DHSUD na maisama ang mga miyembro ng Departments of National Defense (DND) at  Department of Interior and Local Government (DILG) para sa pabahay program.

Hinikayat ng Department of Foreign Affairs (DFA) ang mga Pilipino na stranded sa Sudan na umuwi na ng Pilipinas.

Ito’y sa gitna ng giyera at mga ulat ng pagnanakaw sa mga tahanan ng mga dayuhan doon.

Ayon kay DFA Undersecretary Eduardo De Vega hindi bababa sa 110 Pilipino mula sa Khartoum na ang nakipag-ugnayan sa mga awtoridad ng Pilipinas upang humingi ng tulong.

Gayunman, hindi lahat ay nagnanais na umuwi o bumalik sa Pilipinas.

Kaugnay nito tiniyak ni De Vega na sinusubukan na ng gobyerno na magkaroon ng mass repatriation.

Isinusulong ngayon sa mababang kapulungan ng kongreso ang House Bill 7108 o panukalang “Dog Stations in Shopping Malls Act”.

Ito’y sa gitna ng tumataas na bilang ng mga fur parent o mga may alagang aso.

Sa naturang panukala ni Parañaque Representative Edwin Olivarez nakasaad ang mandatoryong paglalagay ng mga  shopping malls kahit isang dog station sa loob ng kanilang pasilidad kung saan pwedeng iwan ang mga alagang aso habang naglilibot o namimili ang kanilang amo.

Naniniwala ang Kongresista na ang naturang panukala ay magbibigay proteksyon sa mga alagang hayop partikular sa mga alagang aso.

Humihirit ng dagdag sahod ang mga manggagawa ng Unibersidad ng Pilipinas (UP) na itaas sa salary grade 4 ang sahod ng mga empleyado na sakop ng salary grade 1-3.

Gayundin ang gawing salary grade 15 ang entry level sahod ng professional level na research, extension, at professional staff o reps at administrative staff.

Pati na rin ang gawing salary grade 16 ang entry level salary ng instructor 1, at pagtataas ng lecturer’s fee.

Ayon sa binuong UP fight salary network ng mga reps at mga guro ng unibersidad ito’y dahil mahigit 1K empleyado ng UP ang nakatatanggap ng buwanang sahod na nasa salary grade (SG) 1-3 o aabot sa P13,000 hanggang P14,678, na mas mababa sa minimum wage.

Anila, lagpas ito sa kalahati ng mahigit 12,500 na empleyado ng  pamantasan na nasa SG 1-10 o sumasahod ng P13,000 hanggang P23,000 na malayo umano sa P25,248 na family living wage batay sa pag-aaral ng Ibon Foundation.