Agustina Nolasco

Posible pang madagdagan ang matutukoy na mga wanted sa kani-kanilang bansa na mga dayuhang na nasagip mula sa ni-raid na POGO hub sa Las Piñas City kamakailan.

Ayon kay PNP PIO Chief PBGEN Red Maranan, ito ay dahil sa patuloy pa rin ang isinasagawang profiling sa mga nasagip na POGO workers bukod pa sa unang 700 na puganteng natuklasan ng otoridad.

Kabilang na rito ang apat na Chinese nationals at tatlong Taiwanese na wanted sa kanilang bansa dahil sa kasong fraud, drug trafficking, human trafficking at scams.

Nabatid na halos 3K mga POGO workers ang nasagip ng otoridad sa nasabing ikinasang raid noong nakalipas na Linggo.

Naniniwala si House Speaker Martin Romualdez na resulta ng maayos na pamamahala at epektibong polisiya ng liderato ni Pangulong Ferdinand “BongBong” Marcos Jr. ang pagbagal ng inflation rate.

Kasunod ito ng naitalang 5.4% inflation rate nitong Hunyo mula sa 8.7% sa pagsisimula ng kasalukuyang taon.

Kumpyansa ang House Speaker na ito ay tanda na natatamo na ang layunin ng pambansang budget na mapalakas ang purchasing power ng mga Pilipino at naramdaman ito sa unang anim na buwan ng 2023.

Dagdag nito, nakatulong din ang mga hakbang ng kamara sa pagbaba ng inflation rate upang  matukoy ang sanhi ng pagtaas ng presyo ng mga bilihin at pagkontrol sa suplay para tumaas ang presyo.

Itinutulak ni Surigao Del Norte Rep. Robert Ace Barbers at ni Camarines Sur Rep. Lray Villafuerte ang panukalang batas na tatawaging Junior Citizens Act.

Sakaling tuluyang maisabatas pagkakalooban ng health benefits at mga discounts ang mga edad 0 hanggang 12 years old na may pamilyang kumikita ng P250,000.

Gaya na lamang ng 20% discount at VAT exemption sa gamot, bakuna, milk supplements para sa mga edad 4 hanggang 12, professional fee ng mga Doktor sa mga pribadong ospital at health care facilities.

Pati na rin ang professional fee ng mga homecare service providers, medical, dental services at laboratory sa pribadong pasilidad, at iba pa.

Bukod pa rito ang discount sa mga sinehan, pasyalan o amusement park, funeral at burial services sakaling pumanaw.

Pinaplantsa na ng Department of Social Welfare and Development (DSWD) katuwang ang Local Social Welfare and Development Offices (LSWDO) at Local Government Units (LGU) ng Albay para sa  protection efforts sa mga nagsilikas na residente bunsod ng pag-aalburoto ng Mayon volcano.

Naniniwala ang kagawaran na sa pamamagitan ng Emergency Cash Transfer (ECT) matutulungan ang mga ito sa kanilang mga kailangan tulad ng pagkain, gamot, at iba pa, sa panahon ng disaster response phase.

Nabatid na ang ECT ay isang adaptive strategy ng kagawaran para sa mga pamilyang naapektuhan ng sakuna.

Isinusulong ni House Committee on Metro Manila Development Chair Rolando Valeriano sa kamara ang pagdadagdag ng water concessionaire sa Pilipinas.

Kasunod ito ng aniya’y paulit-ulit na water crisis sa Metro Manila kada taon at nang nangyaring water interruption sa kamaynilaan na tumatagal pa ng hanggang 13 oras.

Aniya dapat ibukas sa iba pang private company ang pagsusuplay ng tubig gayong dalawa lang ang water concessionaire ang namamayagpag sa bansa.

Naniniwala ang Kongresista na kung madaragdagan ito ay mas makapaglalatag ng makabago at modernong pamamaraan sa pagsusuplay ng tubig sa Pilipinas tulad sa Singapore.

Umabot na sa 2.7 kilometro ang haba ng lava flow na patuloy na umaagos sa bahagi ng Mi-Isi Gully ng Mayon volcano sa lalawigan ng Albay.

Batay sa pinakabagong ulat ng Philippine Institute of Volcanology and Seismology (PHIVOLCS) ngayong Linggo ng mas mahaba ito kumpara sa 2.23 kilometro nitong Sabado.

Habang nasa 1.3 kilometer pa rin ang haba ng lava flow sa bahagi ng bonga gully at nakapagtala ng apat na volcanic earthquake sa nakalipas na 24 oras.

Ngunit pumalo sa 397 ang rockfall events ang naitala na mas mataas kumapara sa 254 kahapon.

Tiwala si Cagayan De Oro 2nd District Rep. Rufus Rodriguez na magkakaroon na ng mas maayos na suplay ng kuryente sa Mindanao.

Kasunod ito ng pagsisimula ng ikalawang bahagi ng P10.6-billion Mindanao substation upgrading program at operasyon ng 100-megavolt ampere transformer sa Toril District sa Davao City batay sa inanunsyo ng National Grid Corporation of the Philippines (NGCP).

 Ayon kay Rodriguez, ipinagpapasalamat niya ang naturang substation upgrading program at umaasa siyang masusundan ito ng iba pang substation sa CDO at Misamis Oriental upang magkaroon ng stable na suplay ng kuryente sa rehiyon.

Ikinabahala ng Ecowaste Coalition ang patuloy na bentahan maging sa online ng ipinagbabawal na facial cream mula sa china na S’zitang Facial Cream.

Batay sa ulat, nangangako ang produkto na nakapagpapaputi at nagpapabata ng balat ngunit sa pag-aaral delikado ito dahil mayroon itong mercury content na masama sa kalusugan.

Ayon kay Ecowaste Coalition National Coordinator Aileen Lucero nang subukan nilang bumili sa Sta. Cruz, Maynila at nakabili pa sila ng dalawang variant ng produkto.

Matatandaang noong Mayo 2018, tinukoy ng Food and Drug Administration (FDA) ang S’zitang Facial Cream bilang unauthorized cosmetic ang nasabing facial cream dahil hinaluan ito ng  mercury na mapanganib lalo na sa mga buntis.

Posibleng makaranas ng tagtuyot o dry spell ang ilang lalawigan sa Luzon kasama na ang Ilocos Norte hanggang sa Disyembre.

Ayon kay Ms. Ana Liza Solis, Chief ng Climate Monitoring and Prediction Section, Climatology and Agrometeorology Division ng PAGASA, mas mababa ang tiyansa ng pag-ulan o 60% lamang ang pwedeng maranasan sa loob ng tatlong magkakasunod na buwan  sa ilang lugar sa Luzon.

Kung saan mas mababa ang rainfall condition sa loob ng dalawang magkasunod na buwan.

Habang above normal naman aniya ang tiyansa ng ulan ngayong July hanggang Setyembre at pagdating ng Oktubre hanggang Disyembre ay makikita ang epekto ng tagtuyot sa Region.

Nanatili pa rin sa iba’t ibang evacuation centers at hindi pa pinababalik sa kanilang mga tahanan ang nasa 5,773 pamilya o katumbas ng 20,178 na indibuwal sa Albay.

Dahil pa rin ito sa patuloy na pag-aalburoto ng bulkang Mayon sa lalawigan.

Batay sa pinakahuling tala ng Department of Social Welfare and Development (DSWD) 408 pamilya ang nasa labas ng evacuation centers.

Habang 26 na barangay ang apektado mula sa walong munisipalidad sa probinsya.

Kaugnay nito, tiniyak ng ahensya na may sapat pang suplay ng family food packs at non-food items ang imbakan nito para sa pangangailangan ng mga pinalikas.