Agustina Nolasco

Muling binuhay ng gobyerno at ng Moro Islamic Liberation Front (MILF) ang commitment nito sa pagpapatupad ng comprehensive agreement on the Bangsamoro tungo sa kapayapaan sa Bangsamoro region.

Kung saan napagkasunduan nina Government of the Philippines Peace Implementing Panel Chair Cesar Yano at MILF Peace Implementing Panel Chair Mohagher Iqbal na pag-aralang mabuti ang panukalang AFP redeployment parameters and areas for the joint security assessment at transition plan for the Joint Peace and Security Teams (JPSTS).

Gayundin ang integrated framework nito para sa implementasyon ng camps transformation program sa 33 mga barangay ng anim na kinilalang kampo ng MILF.

Bukod pa rito ang planong pagbuo ng socioeconomic study committee at ang mas maigting na implementasyon sa peace agreement.

Naglabas ng direktiba si Valenzuela Mayor Weslie “Wes” Gatchalian na nagbabawal sa Philippine Offshore Gaming Operators (POGO) sa Lungsod.

Sakop ng naturang ordinansang nilagdaan ng alkalde ang lahat ng anyo ng POGO.

Gayundin ang pag-aaplay ng lisensya para makapag-operate, mga ahente nito, service provider at gaming support provider.

Nabatid na ang POGO ay iniugnay sa mga ilegal na aktibidad gaya ng money laundering, human trafficking at maging ang prostitution.

Asahan na ang panibagong price hike sa produktong petrolyo sa Martes.

Kung saan P0.90 sentimo hanggang P1.20 sentimo ang  magiging pagtaas sa presyo ng kada litro ng diesel.

Habang P0.30 sentimo naman ang inaasahang pagsipa sa presyo ng gasolina at P1.00 – P1.30 sentimo ang  presyo ng kada litro ng kerosene.

Ito’y dahil sa inaasahang paglakas ng demand sa langis ng China at India kasabay ng bawas-produksyon ng Saudi Arabia.

Ipinagdiriwang ngayong Linggo ang araw ng mga Pilipinong marino bilang pagbibigay pugay sa mga ito sa pagtupad sa kanilang tungkulin upang suportahan ang kanilang mga mahal sa buhay.

Sa mensaheng ipinaabot ni Pangulong Ferdinand Marcos Jr. sa mga Filipino seafarer ngayong araw pinasalamatan nito ang kanilang pagsasakripisyo.

Aniya nawa’y ang araw na ito ay magbigay ng inspirasyon sa lahat na ipagpatuloy ang tungkulin bilang mahalagang sector.

Tiniyak ni Armed Forces of the Philippines (AFP) Chief of Staff General Andres Centino na payapa na ang sitwasyon ngayon sa Barangay Bualo Lipid, Maimbung, Sulu matapos humupa ang tensyon kahapon sa pagitan ng tropa ng pamahalaan at ng kampo ni dating Maimbung Sulu Vice Mayor Pando Mudjasan nang silbihan ng Warrant of Arrest ang Bise Alkalde kahapon.

Sa panayam ng DWIZ kay General Centino wala nang putukan na naganap at umaasa ang militar na magpapatuloy ang kapayapaan at hindi na lumala pa ang sitwasyon sa Sulu.

Kasabay nito tiniyak ni Centino ang pakikipagtulungan ng militar at ng lokal na pamahalaan ng Sulu upang masiguro ang kaligtasan at mga residenteng malapit sa lugar.

Habang sa ngayon ay patuloy aniya ang operasyon upang maaresto ang nasabing bise alkalde.

Nabatid na isa ang nasawi sa nasabing insidente, walo ang sugatan sa panig ng PNP, isang sundalo ang sugatan din at isang sibilyan na agad namang naisugod sa ospital.

Binubusising muli ng Department of Social Welfare and Development (DSWD) ang listahan ng mga benepisyaryo ng Pantawid Pamilyang Pilipino Program (4Ps).

Kasunod ito ng apela ng ilang mga pamilyang magtatapos na sa programa na manatiling nakapaloob dito para sa patuloy na benepisyo.

Ayon kay DSWD Assistant Secretary Romel Lopez, sinasalang maigi ng kagawaran ang pamumuhay ng mga pamilyang malapit nang magtapos sa programa at ang mga nakaraos na sa hirap ng buhay ay hindi na tatanggap ng cash grants simula sa pay period 6 o mula December 2022 at Enero nang 2023.

Nabatid na nasa 700,000 ang bilang ng mga inaasahang magtatapos sa program.

Simula sa July 1 sakop na ng assistance ng Department of Migrant Workers (DMW) ang mga undocumented Overseas Filipino Workers (OFW).

Ito ang tiniyak ng Department of Foreign Affairs (DFA) kasabay ng paglilipat ng assistance sa DMW mula sa DFA.

Kaugnay nito nilinaw naman ni DFA Undersecretary Eduardo Jose de Vega na mananatili naman ang ₱1 Billion assistance to Nationals’ fund nila gayong may bukod na pondo ang DMW para sa pagtulong sa mga OFW.

Mas palalakasin ng Department of Social Welfare and Development (DSWD) at ng Association of Southeast Asian Nations (ASEAN) ang pagsulong sa Child Rights Protection sa pilipinas.

Ito ang tinalakay sa dalawang araw na dialogue on the United Nations Convention on the rights of the child sa Makati City ngayong araw.

Layunin ng naturang dayalogo na pag-usapan kung paano mas mapabubuti at paiigtingin ang pagsusulong sa karapatan ng mga bata sa proteksyon sa pilipinas.

Gaya na lamang ng mga hakbang kung paano mapalalakas ang kooperasyon ng pilipinas at mga bansang nakaloob sa asean ukol sa naturang usapin.

Gayundin ang  epekto ng COVID-19, digital environment, pagbabago ng klima at kapaligiran, kasarian, kapansanan at iba.

Umabot sa higit pitong libong tickets ang inilabas ng Police Regional Office (PRO) Caraga kasabay ng pagpapatupad ng “no plate, no travel” policy sa mga checkpoints ng nasabing Rehiyon.

Ayon sa PRO Caraga Regional operations Division (ROD) nasa 7, 368 na citation tickets ang inisyu sa mga motorcycle drivers, habang 25 naman sa mga nagmamaneho ng 4 wheel vehicles at 102 na motorsiklo ang na-impound sa paglabag sa nasabing polisiya.

Paliwanag naman ni PRO Caraga Region Director Police Brigadier General Pablo Labra na layon ng polisiya na maiwasan ang mga kaso ng moto napping at mga krimen na sangkot ang mga riding in tandem.

Nag-deploy naman na ang PRO Caraga ng mga pulis sa mga kalsada at komunidad nito para maglagay ng checkpoints at magkaroon ng police visibility.

Inaasahang lalabas na ng Philippine Area of Responsibility mamayang gabi o sa lunes ng madaling araw ang bagyong Chedeng.

Kasunod ito ng patuloy na paghina ng bagyo na mayroong maximum sustained winds na 130 km/h at pagbugsong aabot nasa 160 km/h.

Gayunman ayon sa PAGASA, inaasahan pa rin ngayong araw ang malalakas na pag-ulan at magpapatuloy pa ito sa mga susunod na araw dahil sa hanging habagat.

Habang inaasahan naman bukas sa pagdiriwang ng Araw ng Kalayaan ang maulap at may mga manaka-nakang pag-ulan sa ilang bahagi ng Metro Manila.