Agustina Nolasco

Isinusulong ngayon sa mababang kapulungan ng kongreso ang panukalang mag-aamyenda sa Republic Act 10066, o The National Cultural Heritage Act of 2009 o ang House Bill 8422.

Layunin ng naturang panukalang batas na  mapangalagaan ang mga National Historical Landmarks sa bansa o iyong mga makasaysayang mga lugar, gusali , istraktura at monumento na nakarehistro sa Philippine Registry of Cultural Property.

Kung saan sa pamamagitan ng retrofitting, titiyakin ang tibay ng mga heritage buildings nang hindi babaguhin ang dati nitong disenyo at anyo.

Kasunod ito ng insidente kamaikalan kung saan nasunog ang makasaysayang Central Post Office building sa Maynila.

Timbog ang isang fire volunteer sa Parañaque City matapos mahulian ng 23,460,000 milyong pisong halaga ng hinihinalang shabu sa isang buy-bust operation sa Balimbing Street, Phase 3, Olivarez Compound, Barangay San Isidro.

Ayon kay Southern Police District (SPD) Director PBGEN Kirby John Craft, kinilala ang suspek na si Jonnie Romo.

Kung saan nakumpiska ang dalawang selyadong medium-sized plastic tea bags na may label na guar yun wang, ₱1,000 buy bust money at iba pang paraphernalia.

Bunsod nito kakaharap sa kasong paglabag sa Comprehensive Dangerous Drugs Act of 2002.

Ipinagdiriwang kahapon ang ika-125 National Flag Day.

Ito’y bilang paggunita sa mahalagang milestone ng kasaysayan ng bansa at malaman ang  kahulugan at simbolismo na bumubuo sa watawat ng Pilipinas, kung saan bilang pagdiriwang itinaas ang watawat ng bansa sa Heritage Park sa Imus, Cavite.

Nabatid na ang watawat ng Pilipinas ay iniladlad sa unang pagkakataon sa Teatro Caviteño sa Cavite City matapos manalo ang mga Rebolusyonaryong Pilipino sa labanan sa Alapan noong Mayo 28, 1898.

Handa na rin ang Philippine Red Cross (PRC) sa posibleng maging epekto ng bagyong Betty sa bansa.

Ayon kay PRC Chairman Dick Gordon, naka-monitor ngayon ang PRC sa Northern Luzon na inaasahang pinaka matatamaan ng bagyo.

Habang kabilang aniya sa kanilang inihanda ay ang logistics, manpower at equipment  na magagamit sakaling may kailanganin ng tulong.

Nag-anunsyo na ng walang pasok ang ilang mga paaralan sa bansa bukas araw ng Lunes dahil sa bagyong Betty.

Kasunod ito ng anunsyo ng PAGASA na simula ngayong gabi o sa Lunes mararanasan ang malalakas na pag-ulan dulot ng bagyo.

Kabilang sa mga walang pasok ay ang lahat ng antas sa pribado at pampublikong paaralan sa Cagayan at Ilocos Sur.

Gayundin ang mga pasok sa trabaho sa mga opisina ng gobyerno sa Ilocos Sur.

Nakasailalim ngayon sa signal number 1 ang nasa 12 na lugar sa bansa dahil sa bagyong Betty.

Kabilang na dito ang Batanes, Cagayan kasama ang Babuyan Islands, Isabela, Apayao at Ilocos Norte.

Pati na rin ang hilaga at gitnang bahagi ng Abra, Kalinga, Silangan at gitnang bahagi ng Mountain Province at Ifugao.

Gayundin ang hilaga at gitnang bahagi ng Aurora, Quirino at hilagang silangang bahagi ng Nueva Vizcaya.

Ayon sa PAGASA, mararanasan ang malalakas na hangin  mula 39 hangggang 61 kilometers per hour sa mga nasabing lugar simula ngayong gabi ng Linggo o sa Lunes.

Siniguro ni PAGASA-DOST Hydro Meteorological Division Chief Engineer Roy Badilla na hindi magpapakawala ng tubig ang mga dam sa bansa sa gitna ng bagyong Betty.

Ito’y dahil sa nananatili pa rin aniya ang mababang lebel ng tubig sa mga dam at karamihan sa mga dam sa luzon ay bumaba pa ang water level.

Ayon kay Badilla, ito’y kahit pa itaas sa orange at red rainfall warning ang ilang lugar sa pilipinas bukas araw ng Lunes.

Nabatid na batay sa pinakabagong ulat ng PAGASA inaasahang sa Huwebes lalabas ng Philippine Area of Responsibility (PAR) ang bagyong Betty.

Habang sa Northern at Extreme Northern Luzon pinaka mararanasan ang malalakas na pag-ulan at dahil sa hanging habagat naman mararanasan ang  manaka-nakang pag-ulan  sa Metro Manila simula sa bukas.

Muling siniguro ni Metropolitan Manila Development Authority (MMDA) General Manager Procopio Lipana ang kahandaan ng ahensya sa bagyong Betty.

Ito’y sa kabila ng paghina ng bagyo na inaasahang hindi lubhang makakaapekto sa Metro Manila.

Kabilang na aniya rito ang pagkakaroon ng portable pump at ang patuloy na  declogging operation ng MMDA upang maalis ang mga basura sa kanal na nagdudulot ng pagbaha.

Ayon kay Lipana, patuloy na nakaantambay ang kanilang tropa sakaling kailanganin  ang tulong nito.