Airiam Sancho

Pumalo na 70- M ang bilang ng mga pilipinong nasa employable age bracket.

Sa datos ng Commission on Population and Development (POPCOM), higit sa kalahati ng kabuuang populasyon ng Pilipinas ang nasa working-age bracket na 15  hanggang 64 na taong gulang.

Malaking pagkakataon anila ito upang mapasigla ang ekonomiya ng bansa.

Magugunitang iniulat ng Philippine Statistics Authority (PSA) nitong Nobyembre na umabot na sa 95% ang employment rate ng bansa. -sa ulat mula kay Gilbert Perdez (Patrol 13).

Dapat na magpatupad ng mga hakbang ang pamahalaan upang maibsan ang pagsisikip ng mga paliparan sa bansa  at mapahusay pa ang serbisyo nito

Ito ang panawagan ni Senate Committee on Public Services Chairman Senator Grace Poe sa gobyerno sa harap ng inaasahan na ring pagdagsa ng mga kababayan natin sa airport lalo na sa Ninoy Aquino International Airport (NAIA) ngayong holiday season.

Ayon sa senador, nagiging problema sa NAIA ang kawalan ng espasyo kaya naman panahon na para maglatag ng solusyon ukol sa mga reklamong nararanasan ng mga pasahero.

Kabilang naman sa mga solusyon na hahanapin ni Poe sa Manila International Airport Authority (MIAA) ang pagpapatupad ng digitalization at automation gayundin ang pagbabawas sa mga red-tape sa prosesong pinagdaraanan ng mga pasahero.

Samantala, hinimok ni Poe ang Department of Transportation (DOTr) na makipagtulungan sa miaa upang aralin at sukatin ang buong duration sa mga prosesong gagawin ng isang pasahero tulad ng x-ray procedures, immigration lines, pag check-in, at pagsuri sa mga flight itineraries. – sa ulat mula kay Cely Ortega-Bueno (Patrol 19).

Mas pinipili ng mga Pilipino ngayon ang bumili ng sariwang karne mula sa mga local producer.
Kasunod ito ng paghimok ng Department of Agriculture sa publiko na bumili ng frozen meat.

Ayon kay Samahang Industriya ng Agrikultura (SINAG) President Rosendo So, hindi mabenta sa ngayon ang frozen meat kaya nahihirapan ang da na mailatag ito sa market.

Bukod pa rito, kaunti lamang aniya ang deperensya sa presyo kaya’t mas gusto pa rin ng mga mamimili ang local at fresh na suplay ng karne.

Nabatid na sinabi ng da na sapat ang suplay ng karne sa bansa.

Nakahanda na ang Manila Police District (MPD) para sa pagsisimula ng simbang gabi sa December 16.

Ayon kay MPD Director Brigadier General Andre Dizon, tututukan nila ang mga misa sa gabi at madaling araw.

Kabilang din ang pagbabantay sa mga matataong lugar partikular sa malls, palengke at divisoria.

Tiniyak naman ni Dizon na may naka-reserba silang pwersa ngayong holiday season alinsunod sa utos ni PNP Chief Rodolfo Azurin Jr.

Napanatili ng Bagyong Rosal ang lakas nito habang binabaybay ang Silangang-Hilagang Silangang bahagi ng Extreme Northern Luzon.

Ayon sa PAGASA Weather Bureau, ito ay may lakas ng hanging aabot sa 85 km per hour at pagbugsong aabot naman sa 105 km per hour at kumikilos sa bilis na 25 km per hour at wala nang direktang epekto sa malaking bahagi ng bansa.

Inaasahang hihina na bukas ng gabi o miyerkules ng madaling araw ang Bagyong Rosal at magiging isa nalamang lpa kaya mababa ang tiyansa na maglandfall ito sa anumang bahagi ng bansa.

Asahan naman na magiging maaliwalas ang panahon sa bahagi ng Metro Manila, Visayas partikular na sa Metro Cebu, at Davao Region pero posibleng ulanin sa hapon hanggang sa gabi maging sa Batanes at Babuyan Islands bunsod ng isolated thunderstorms.

Sa ngayon, wala nang namomonitor na Low Pressure Area (LPA) ang PAGASA o sama ng panahon sa loob at labas ng bansa at asahan din na lalakas ang Northeast Monsoon sa susunod na 24 na oras na magpapaulan sa Ilocos Norte, Northern at Eastern Cagayan at sa Eastern Isabela.

Nagpaalala naman sa publiko ang pagasa sa posibleng pagbaha at pagguho ng lupa, manatiling maging alerto, at makinig sa mga abiso ng mga lokal na pamahalaan para sa kaligtasan ng bawat isa.