Airiam Sancho

Gumagawa na ng paraan ang Occidental Mindoro Electric Cooperative (OMECO) na maayos ang kanilang Power Supply Agreement sa Energy Regulatory Commission (ERC).

Dahil ito sa hindi magandang sitwasyon ng lalawigan kaugnay sa krisis sa suplay ng kuryente at nagbabadyang pagsasara o shutdown ng power provider.

Sa panayam ng DWIZ, iginiit ni Department of Energy (DOE) Undersecretary Rowena Guevara na kailangan ding maaprubahan ng ERC ang rates ng electric cooperative sakaling may papalitan.

Bukod dito, mayroon aniyang permanenteng solusyon na ginagawa ang ahensya hinggil sa usapin sa pamamagitan ng National Transmission Corporation.

Lumagda ang Manila Water Company Inc. ng P200M loan facility sa Bank of the Philippine Islands para sa Bulakan Water.

Gagamitin ito para sa pagpapalawig at pagpapabuti ng service facility, water source, distribution system, at provision of sanitation services sa Bulakan Water.

Nabatid na una nang nakuha ng Razon’s Prime Metroline Holdings Inc. Trident Water Company Holdings ang 51% voting interest sa Manila Water Company.

Abiso para sa motorista!

Asahan ang pagtaas ng presyo ng produktong petrolyo sa susunod na linggo.

Ayon sa Oil industry, posibleng tumaas sa P2.20 hanggang P2.70 kada litro ang presyo ng diesel.

Habang madadagdagan naman ng P2.40 hanggang P2.90 kada litro sa kerosene at P3.00 hanggang P3.50 kada litro sa gasolina.

Nabatid na karaniwang inaanusyo ang price adjustments ng mga kumpanya ng langis tuwing Lunes at ipinatutupad naman ito sa susunod na araw.

Nagbigay ang US Government ng tatlong evidence containers na nagkakahalaga ng P1.6-M ($30,700) para palakasin ang kapasidad ng Palawan Council for Sustainable Development (PCSD) na maayos na mapanatili ang mga nakumpiskang kontrabando at ebidensya na ipinakita sa imbestigasyon sa mga wildlife trafficker at mga taong nakikibahagi sa environmental crime.

Ini-handover ang nasabing kagamitan sa PCSD headquarters sa Puerto Princesa City na pinangunahan ni US Department of State Bureau of International Narcotics and Law Enforcement Affairs (INL) Principal Deputy Assistant Secretary Lisa Johnson.

Pinasalamatan naman ni PCSD Executive Director Niño Rey Estoya ang US Government para sa patuloy na pagsuporta.

Ayon sa Asian Development Bank, tinatayang nasa P548-B ($10b) hanggang P1.26-T ($23b) bawat taon ang halaga ng global illegal wildlife trade kada taon, kung saan itinuturing ang wildlife crime bilang 4th most lucrative illegal business.

Samantala, nagsimula ang pagsuporta ng INL sa environmental justice ng Palawan noong 2019 sa pamamagitan ng P28-M ($500k) partnership sa US Forest Service para palakasin ang institutional capacity ng PCSD laban sa naturang krimen. —sa ulat ni Raoul Esperas (Patrol 45)

Limang silid-aralan ang napinsala ng magnitude 4.8 na lindol na tumama sa Vinzons, Camarines Norte kaninang umaga.

Ayon kay Vinzons Mayor Eleanor Segundo, nagtamo ng maraming bitak ang mga classrooms sa Banocboc Elementary School dahil sa lindol na tumama alas-5:57 ng umaga kanina.

Posible rin aniya na hindi na magamit ang mga silid-aralan.

Gayunpaman, iniulat ni segundo na walang naitalang casualty at nasirang mga gusali o pasilidad ng gobyerno.

Nananatili ding normal ang suplay ng kuryente sa naturang lugar.

Nabatid na naramdaman sa ilang bahagi ng Metro Manila, kabilang ang Marikina, at Pasig City maging sa San Roque, Northern Samar.

Hindi gaanong maaapektuhan ng mataas na presyo ng itlog at asukal ang presyo ng pandesal at bread loaves.

Pero, ayon kay President Chito Chavez ng Asosasyon ng Panaderong Pilipino, asahan ang pagtaas sa presyo ng mga cake at ibang pastries.

Kabilang dito ang mga mamon, egg pie, at brazo de mercedes.

Nabatid na tumaas sa 215 pesos kada tray ngayong taon mula sa 155 pesos per tray ang presyo ng itlog.

Hinimok naman ni Chavez ang pamahalaan na tulungan ang mga maliliit na tindahan o bakery partikular na sa pagsulong ng agribread products tulad ng malunggay pandesal.