Airiam Sancho

Inilunsad ng lokal na pamahalaan ng lungsod ng San Juan ang Kadiwa ng Pasko ngayong araw.

Pinangunahan ito ni Mayor Francis Zamora kaninang alas-8:00 ng umaga sa San Juan City Hall Atrium.

Dumalo rin sa nasabing aktibidad ang anak ni Pangulong Ferdinand Marcos Jr. na si Simon Marcos.

Ang Kadiwa ng Pasko ay proyekto ng punong ehekutibo sa pamamagitan ng Office of the President at Presidential Management Staff katuwang ang Department of Agriculture at iba pang ahensya ng gobyerno.

Layunin nito na magbigay ng mura at kalidad na produkto sa publiko upang matugunan ang pagtaas ng presyo ng mga bilihin ngayong Christmas season.

Samantala, bukas ang kadiwa ng pasko mula alas-7:00 ng umaga hanggang alas-5:00 ng hapon.

Tumaas ang bilang ng mga Pilipinong sobra ang timbang o iyong mga obese sa panahon ng pandemya.

Batay sa 2021 Expanded National Nutrition Survey (ENNS) na isinagawa ng Department of Science and Technology-Food and Research Institute(DOST-FNRI), naitala ang 3.9% ng obesity rate sa zero hanggang limang taong gulang, at 14% naman sa lima hanggang sampung taong gulang.

Bukod dito, isa rin sa bawat sampung kabataan ang obese habang apat sa bawat sampung matanda ang overweight.

Ipinapakita pa ng survey na 10% ng matatandang 20 hanggang 59 na taong gulang ang may kaparehong kondisyon.

6.2% naman sa mga animnapung taong gulang pataas ang obese habang 11.8% ang may chronic energy deficiency.

Samantala, isinagawa ng DOST ang ENNS sa mahigit 140,000 indibidwal noong July 2021 hanggang June 2022 sa 37 lalawigan at lungsod sa bansa.

Nakipag-pulong si Pangulong Ferdinand Marcos Jr. sa mga opisyal ng National Economic Development Authority (NEDA) upang talakayin ang Philippine Development Plan (PDP) para sa 2023-2028.

Ito ang inanunsyo ng Office of the Press Secretary na pag-uusapan din sa pagpupulong ang mga hakbang upang matugunan ang mga hamon na kinahaharap ng bansa.

Bilang bahagi ng Philippine Economic Recovery, layunin ng naturang plano na lumikha ng mas maraming trabaho para sa mga Pilipino at mabawasan ang poverty rate o kahirapan sa bansa.

Ang Philippine Development Plan 2023-2028 ay naglalaman ng mga target at estratehikong aksyon ng mga ahensya ng gobyerno sa susunod na anim na taon.

Inihayag ng Department of National Defense (DND) na nasa $66.5M ang inilaan para sa mga na-aprubahang proyekto sa ilalim ng Enhanced Defense Cooperation Agreement (EDCA) sa United States.

Ayon sa ahensya, itatayo ang konstuksyon ng mga proyekto sa mga napagkasunduang lokasyon sa 2023.

Kabilang dito ang training, warehouse, at iba pang pasilidad sa Cesar Basa Air Base sa Pampanga, Fort Ramon Magsaysay sa Nueva Ecija, at Lumbia Airport Base Station sa Cagayan De Oro.

Samantala, upang mapabalis ang pagpapatupad ng EDCA, sinabi ng DND na tatapusin nito ang Infrastructure Enhancement at Repair Projects, pagbuo ng mga bagong proyekto sa kasalukyang EDCA locations, at pagtuklas ng mga bagong lokasyon.