Airiam Sancho

Posibleng maharap sa disciplinary sanctions ang 10 flight crew members ng Philippine Airlines (PAL) matapos mahuling nagpuslit ng iba’t ibang uri ng prutas at gulay mula sa Riyadh at Dubai.

Kahapon, January 14 nang harangin ng mga otoridad ang flight attendants dahil sa mga nadiskubreng sibuyas, lemon, strawberries, at blueberries sa kanilang mga bagahe,

Ayon sa Bureau of Plant and Industry (BPI), bigong magpakita ang mga crew ng import permit at phytosanitary permit na kailangan sa pagpasok ng produktong pang-agrikultura sa bansa.

Nabatid na sinubukan umano ng mga flight attendants na sirain ang mga nasabing agri-products nang malaman na kukumpiskahin ito.

Samantala, patuloy naman ang imbestigasyon na isinasagawa ng PAL kaugnay sa naturang insidente.

Patuloy pa rin na mararanasan ang pag-ulan ngayong weekend dahil sa Low Pressure Area (LPA) at Northeast monsoon o Amihan.

Batay sa weather bulletin ng PAGASA, magdadala ang LPA ng kalat-kalat na pag-ulan at pagkidlat sa Bicol region, Eastern Visayas, Dinagat Islands, at Surigao Del Norte.

Asahan rin ang masamang panahon sa Calabarzon, Mimaropa, at natitirang bahagi ng Visayas at Mindanao.

Pinag-iingat naman ng weather bureau ang mga residente sa posibleng flash floods o landslide sa kani-kanilang lugar.

Nabatid na nakapagtala ang NDRRMC ng 17 tao na nasawi dahil sa pagbaha dulot ng LPA, shear line, at Northeast monsoon o Amihan.

Nakatanggap ang Department of Trade and Industry ng Notice of Price Adjustment o taas-presyo mula sa mga manufacturer ng ilang produkto.

Kabilang dito ang sardinas, meat loaf, corned beef, kape, at sabon.

Ayon sa ahensya, pinag-aaralan nila ang usapin ngunit kailangan ding maging makatwiran ang presyo para sa kapakanan ng mga mamimili.

Matatandaang huling naglabas ng Suggested Retail Price (SRP) sa ilang bilihin ang DTI noong August 2022.

Sumampa na sa 20 ang bilang ng mga nasawi dahil sa pag-ulan at pagbaha na dulot ng Low Pressure Area(LPA), Northeast monsoon o Amihan, at Shearline mula noong January 1, 2023.

Sa datos ng National Disaster Risk Reduction and Management Council (NDRRMC), 5 ang naitalang namatay sa Region 5; 6 sa Region 8; tig-4 sa Region 9 at Region 10; at isa sa Region 11.

10 mula sa nasabing bilang ang naberipika na habang 10 naman ang inaalam pa.

Nakapagtala rin ang NDRRMC ng 8 sugatan mula sa Region 9 at Region 10 habang isa ang nawawala sa BARMM.

Umabot naman sa 133,258 pamilya o katumbas ng 552, 131 indibidwal ang naapektuhan.

Samantala, pumalo na sa P257,765,961 ang halaga ng pinsala sa sektor ng agrikultura habang P171,230,996 sa imprastruktura.

Batay sa PAGASA, patuloy pa rin na magpapaulan sa mga apektadong lugar ang LPA na natagpuan malapit sa Surigao del Sur at ang Northeast monsoon o Amihan.