Angelica Doctolero

Nagbabala sa mga residente ang Philippine Institute of Volcanology and Seismology kaugnay sa patuloy na degassing activity ng bulkang Taal.

Ayon sa  PHILVOCS , patuloy na nagbubuga ng sulfur dioxide ang Taal volcano na nagdulot ng makapal na steam-rich plumes makaraang umabot sa halos 6,000 kilometro ang taas na ibinubugang gas nito.

Dahil dito, nagkaroon ng Volcanic Smog sa paligid ng bulkang Taal na siyang bumubuo ng mga pinong droplet na naglalaman ng volcanic gas na maaring magdulot ng pangangati sa mata, lalamunan, at respiratory tract sakaling bumagsak ito sa katawan ng tao.

Nagpaalala ang PHILVOCS lalo na sa mga residenteng nakatira malapit sa Taal volcano na mas mainam kung manatili nalang sa loob ng bahay, isara ang mga pinto at binatan ng bahay upang hindi pumasok ang makakapal na abo mula sa Taal main crater at gumamit na makapal na panaklob at N95 mask sakaling lalabas ng bahay.

Sinabi ng PHILVOCS na madalas tinatamaan ng vog yung mga may kondisyong pangkalusugan tulad ng hika, sakit sa baga at sakit sa puso, mga matatanda, mga buntis na kababaihan at mga bata.

Maaari namang uminom ng maraming tubig ang mga tinamaan ng volcanic gas upang mabawasan ang anumang pangangati o paninikip ng lalamunan

Binigyang diin ng National Water Resources Board na ang desisyon sa alokasyon ng tubig ay nakabatay sa sitwasyon ng water level sa angat dam, na kasalukuyang nasa 189.6 meters.

Ito ang inihayag ni NWRB Executive Director Dr. Sevillo David Jr., sa eksklusibong panayam ng DWIZ, na posible pang maibigay ang pangangailangan ng mga residente sa Metro Manila maging sa mga irigasyon.

Ayon kay Executive Director David, dapat maikunsidera ang epekto ng El Niño sa bansa na inaasahang tatagal hanggang sa susunod na taon kung saan, target ipagpatuloy ang pagrelease ng tubig sa Anggat Dam.

Sinabi pa ni Dr. David, na patuloy ang pakikipag-ugnayan ng kanilang ahensya sa Metropolitan Waterworks and Sewerage System, mga water concessionaires, at iba pang ahensya ng gobyerno kaugnay sa alokasyon ng tubig upang maiwasan ang water interruption at matugunan ang pangangailangan ng mga residente.

Nanawagan din sa publiko ang opisyal, na magtipid sa paggamit ng tubig upang maiwasan ang malalang epekto ng El Niño sa bansa.

Iginiit ng Manila Water Services na wala pa silang natatanggap na opisyal na abiso mula sa Metropolitan Waterworks and Sewerage System kaugnay sa planong pagpataw ng mas matinding parusa sa mga water concessionaires na mabibigong gampanan ang kanilang serbisyo sa taumbayan.

Kasunod ito ng pagkaantala ng tubig sa ilang lugar sa bansa partikular na sa metro manila, bunsod ng maintenance activities.

Sa panayam ng DWIZ, sinabi ni Dittie Galang, Head Corporate Communications ng Manila Water, na pinag-aaralan na nila ang implementing rules and regulation sakaling magpatupad ng kautusan ang mwss.

Ayon kay Galang, mababa ang posibilidad na magpatupad ng water interruption ang Manila Water sa Metro Manila at iba pang lugar sa bansa sa kabila ng epekto ng El Niño.

Nanganganib magsara ang mahigit 100 pribadong unibersidad at kolehiyo dahil sa P1- B halaga ng utang sa kanila ng Commission on Higher Education (CHED).

Ito ang ibinabala ni House Senior Deputy Minority Leader at Northern Samar 1st district Rep. Paul Daza, matapos umabot sa anim na P1-B ang halaga ng utang ng CHED.

Ayon kay Cong. Daza, posibleng magsara ang mayorya sa mga kolehiyo sa Mindanao Region dahil may atraso pa ang CHED sa dalawang kolehiyo sa lugar, matapos bigong maibigay ng ahensya ang P131 –M at P80- M na utang.

Nabatid na hindi nagbayad ang CHED ng Tertiary Educational Financial Assistance para sa mahihirap na mga estudyante sa ilalim ng Republic Act 10931 o ang free access to Tertiary Education Act. Bunsod ng kakulangang ng pondong inilaan ng Department of Budget and Management.

Sa pahayag ni CHED Chairman Prospero De Vera III, walang pondong inilaan para sa test program noong 2021 at 2022 kung saan, direkta ring ibinigay sa mga state universities at colleges ang reimbursements para sa matrikula at iba pang bayarin.

Dahil dito, iminungkahi ng kongresista, na pansamantalang gamitin ang mahigit P10-B pondo na nakalaan sa Higher Education Development Fund para masolusyonan ang problema sa mga unibersidad at kolehiyo.

Nagpaalala sa publiko ang PNP anti-cybercrime group kaugnay sa naglipanang online job posting.

Ito’y dahil marami na ang nabibiktima ng human trafficking kung saan, madalas na tinatarget ang ilang mga dayuhan.

Ayon sa mga otoridad, sampung suspek ang kanilang nahuli na nagre-recruit ng mahigit 1000 foreign nationals sa isang BPO company sa Pampanga.

Sa pahayag ng mga biktima, kinuha ng mga suspek ang kanilang passport at sapilitang pinagtatrabaho ng sobra sa regular na oras.

Nabatid na 16  na oras hanggang 18  oras nagsisilbi sa kanilang trabaho ang mga biktima nang walang natatanggap na overtime pay.

Dahil dito,nagbigay ng payo sa publiko ang PNP- ACG, na huwag basta-basta maniniwala sa panghihikayat ng hindi kilalang indibidwal at sakaling makaranas ng ganitong sitwasyon, agad na ipagbigay alam sa kinauukulan upang maaksiyonan ng mga otoridad.

Muling pinatawan ng 60 araw na suspensiyon sa kamara si Negros Oriental 3rd District Rep. Arnolfo Teves Jr., dahil sa kaniyang patuloy na pananatili sa ibang bansa at hindi pagharap sa mga alegasyong kinakaharap nito kaugnay sa degamo slay case.

Sa huling araw ng regular session ng 19th congress, nagdesisyon ang House Committee on ethics and priveleges, na muling suspindehin ang kongresista dahil sa kaniyang “Disorderly Behavior.”
Batay sa rekomendasyon ni House Ethics Chairman Felimon Espares, patuloy lamang na lumalabag si Cong. Teves, sa utos na umuwi na ng bansa para harapin at depensahan ang pagkakadawit ng kaniyang pangalan na itinuturong mastermind sa pagpatay kay Negros Oriental Gov. Roel Degamo at 9 na iba pa.

Bukod pa dito, forfeited din ang membership ni Cong. Teves sa komite kabilang na ang pagiging vice chairman nito sa committee on game and amusement at ang pagiging miyembro sa legislative franchises at nuclear energy committee.

Ang pagkakasuspinde kay Cong. Teves ay desisyon ng 285 na kongresista na pabor na i-adopt ng kamara ang rekomendasyon ng house committee on ethics and privileges.
Dahil dito, hindi pinapayagang makadalo sa mga meeting ang suspendidong mambabatas dahil sa kaniyang suspension.

Matatandaang, unang inihayag ng mambabatas na hindi siya uuwi ng bansa hanggat may mga banta sa kaniyang buhay at sa kaniyang pamilya.

Inaasahan ng Bangko Sentral ng Pilipinas ang patuloy na pagbulusok ng inflation sa Mayo o mananatili sa parehong antas noong abril sa gitna ng mababang presyo ng gasolina, pagkain at utility.

Batay sa kanilang forecast, inihayag ng B.S.P. Na posibleng umabot sa 5.8 hanggang 6.6 % AGN inflation rate noong Mayo.

Gayunman, ang pagtaas ng presyo ay magmumula sa mas mahal na bigas, gulay at iba pang pangunahing pagkain gayundin ang pagtaas ng liquefied petroleum gas at singil sa kuryente.

Samantala, nakatakda namang ilabas ng philippine statistics authority sa Hunyo 6 ang opisyal na inflation rate report para sa Mayo.

Nanawagan sa National Water Resources Board ang Metropolitan Waterworks and Sewerage System-Corporate Office, na panatilihin at huwag nang bawasan ang alokasyon ng tubig sa Angat dam na nagsusuplay ng tubig sa buong Metro Manila.

Ayon kay MWSS Division Manager Engineer Patrick Dizon, hindi na dapat baguhin hanggang sa Hunyo ang inilaang alokasyon ng tubig upang walang lugar sa Metro Manila ang makaranas ng mahabang pagkaantala sa suplay ng tubig.

Sinabi ni Engr. Dizon, na tumataas ang demand sa tubig ng mga konsyumer ng Manila Water at Maynilad kung saan, dapat ding maging responsable sa paggamit ng tubig ang publiko lalo’t pinangangambahan ang pagtama ng El Niño phenomenon ng bansa.

Nilinaw naman ni DM Dizon, na nakatakdang magsagawa ng pagpupulong ngayong araw, ang mga tauhan NWRB, upang pag-aralan kung ibababa o itataas ang kasalukuyang 52 cubic meters per second na alokasyon ng tubig.

Nabigla ang mga miyembro ng Partido Demokratiko Pilipino–Lakas ng Bayan sa biglaang pagbitiw sa puwesto ni Sen. Robin Padilla bilang Executive Vice President ng partido.

Sa liham na ipinadala ng senador, na may petsang May 29, 2023 nagpasya itong magbitiw sakaniyang posisyon na isang irrevocable o hindi na mababawi.

Ayon kay PDP-Laban President at Palawan 2^nd District Rep. Jose Alvarez, nagulat ang buong miyembro ng partido sa biglaang pagbitiw ng senador.

Sinabi ni Cong. Alvarez, na naiintindihan nila ang desisyon ni Sen. Padilla dahil posibleng abala ang mambabatas sa sunud-sunod na pagdinig sa senado kung saan, halos hindi na ito nakadadalo sa pagpupulong ng PDP-Laban.

Hindi naman binanggit kung ano ang dahilan ng pagbitiw ng senador pero mananatili pa rin itong miyembro ng partido.

Matatandaan na irrevocable resignation din ang ginawa ni Vice President Sara Duterte-Carpio bilang Chairman ng partido Lakas-CMD matapos tanggalin bilang Senior Deputy Speaker ang dating pangulo at ngayo’y Pampanga 2^nd District Rep. Gloria Macapagal-Arroyo.

Lusot na sa ikatlo’t huling pagbasa sa senado ang Senate Bill 2020 na lilikha sa Maharlika Investment Fund (MIF)

Inaprubahan sa botong 19-1-1 ng mga senador ang nasabing panukala dakong 12:30 am  matapos ang halos 12 hours na debate sa plenaryo at sertipikahan bilang urgent.

Tumutol sa panukala si Senador Risa Hontiveros habang nag-abstain si Senador Nancy Binay habang wala sa botohan sina Senators Imee Marcos, Chiz Escudero at Koko Pimentel.

Sa inaprubahang bersyon, tinanggal ang probisyon na nagpapahintulot sa mga government financial institutions at government owned and controlled corporations na mag-invest sa MIF Bill.

Ito’y sa kabila ng mga mosyon nina Senators Ronald Dela Rosa, Raffy Tulfo at Pia Cayetano na amyendahan at ilagay ang probisyon na titiyak na hindi magagalaw ang pension funds ng mga government at private sector employees.

Nakasaad sa probisyon ang phrase o kataga na ipagbabawal ang pag-i-invest ng G.S.I.S., S.S.S.., PhilHealth, OWWA, PVAO at Pag-ibig sa M.I.F., mandatory man ito o boluntaryo.

Samantala, magsasagawa ng BI-CAM Conference Committee meeting mamayang 11 a.m.  kung saan magiging kinatawan ng BI- CAM panel sina Senators Mark Villar, Pia Cayetano, Bato Dela Rosa, Sherwin Gatchalian, Francis Tolentino, Alan Peter Cayetano at Pimentel sa panig ng senado.