Angelica Doctolero

Pinaghahandaan na ng mga ahensya ng gobyerno ang posibleng pagpasok ni Typhoon Mawar sa Philippine Area of Responsibility (PAR) ngayong linggo.

Ayon kay Presidential Communications Office Secretary Cheloy Garafil, nagsagawa ng pagpupulong ang mga departamento para talakayin ang mga hakbang laban sa magiging pinsala ng bagyo.

Bumuo din ng programa ang National El Niño team na may layuning mas makatipid sa tubig at para mabawasan ang epekto ng tagtuyot sa bansa.

 Patuloy ding nakikipag-ugnayan ang Department of Environment and Natural Resources, Department of Agriculture at National Irrigation Administration para sa augmentation ng supply sa mga potable water.

 Bukod pa dito, inaalam narin ang posibleng maging kabawasan sa water level ng Angat dam, sakaling pumasok na ng bansa ang naturang bagyo na papangalanang ‘Betty’.

Paiigtingin ng Philippine National Police, ang pagbabantay para sa nalalapit na Barangay at Sangguniang Kabataan Elections na gaganapin sa Oktubre.

Ayon kay PNP Pio Chief BGen. Redrico Maranan, mataas ang posibilidad na kumalat ang drug money o pera galing sa transaksiyon ng ilegal na droga, na maaaring gamitin ng mga tiwaling opisyal sa BSKE.

Bukod pa rito, maari ding gamitin ng mga pulitiko ang mga private armed group kaya mas lalong hihigpitan ang pagbabantay sa mga barangay para maiwasan din ang iligal na pagbebenta at pagbili ng mga boto.

Suportado din ng PNP ang mungkahing drug test para sa lahat ng Barangay officials, bago ang pagdaraos ng lokal na halalan.

Sinabi ni BGen. Maranan, na isa ito sa magandang hakbang upang maiwasang mailuklok ang mga politiko na sangkot sa krimen at iligal na droga.

Binigyang diin ni Senator Christopher “Bong” Go, na dapat nang kasuhan ang mga smuggler na patuloy na lumalabag at nag-iipit ng mga produkto sa bansa.

Ayon sa senador, dapat nang buhayin ang Anti-Smuggling Law, para malutas ang problema sa mataas na presyo ng mga bilihin sa merkado.

Sinabi ni Sen. Go, na posibleng may nag-ho-hoard at nagtatago sa suplay ng agricultural products gaya nalang ng sibuyas, asukal, at bigas dahilan kaya tumataas ang presyo nito sa mga pamilihan partikular na sa Metro Manila.

Iginiit ng senador na dapat unahin ang paghuli sa mga smuggler at unahin ang mga local farmers bago mag-angkat ng mga produkto sa bansa.

Dagdag pa ni Sen. Go, ang mga magsasaka ang naghihirap at nagsasakripisyo kaya dapat lang na sila ang suportahan ng gobyerno.

Nangako sa publiko si PBGen. Red Maranan, na kanilang ipagpapatuloy ang magandang performance ng Philippine National Police, kasunod ng 80% trust rating na kanilang nakuha sa ikinasang survey ng OCTA research team.

Sinabi ni General Maranan, na kanilang paiigtingin ang maayos na paglilingkod sa taumbayan at sisiguraduhin ang seguridad at kaligtasan ng bawat mamamayan, upang maibalik ang tiwala ng publiko sa ahensya.

Matatandaang noong March 24 – March 28, nagsagawa ng survey ang OCTA, kung saan walo mula sa kada 10 pilipino ang nagsasabing pinagkakatiwalaan at satisfied sila sa pagganap sa tungkulin ng mga tauhan ng PNP.

Binigyang diin ng opisyal, na ang magandang rating na nakuha ng ahensya, ay bunga ng patuloy na pakikipag ugnayan ng PNP sa mga lokal na komunidad at simbahan para isulong ang  peace and order.

Bukod pa dito, buo din ang pagsusumikap at dedikasyon ng pnp na agarang makapag-responde sa mga insidente, madakip ang mga kriminal,  at maiwasan ang mga krimen.

Naniniwala si Gen. Maranan na nakatulong sakanila ang patuloy na pagsasanay sa mga miyembro ng pambansang pulisya na nagpahusay sa propesyonalismo ng kanilang mga tauhan.

Aminado naman ang opisyal na malaking hamon para sa PNP, na mapanatili ang magandang performance, para kumbinsihin ang publiko kaugnay sa magandang serbisyo ng ahensya.

Hindi dumaan sa pagsusuri ng anumang ahensya ng gobyerno kung may panganib sa National Security; kung may virus; at kung kayang i-access ng gobyerno ng China ang mga equipment na binili sa China ng National Grid Corporation of the Philippines.

Ito ang lumitaw sa pagtatanong nina Senator Raffy Tulfo at Senator Alan Peter Cayetano sa Department of Information and Communications Technology (DICT) sa naging pagdinig sa senado.

Ayon kay Sen. Tulfo, posibleng nataniman na ng virus ang mga equipment na inimport mula sa China kung saan,  nasa Chinese characters ang manual at hindi umano alam na i-operate ng mga pilipinong technician.

Kinwestiyon din ni Senator Cayetano, kung wala bang regulasyon ang gobyerno para suriin ang mga imported equipment kung may nakabaon nang virus o worm at kung may vulnerability.

Ayon kay Asssistant Secretary Renato Paraiso ng DICT Legal Affairs, walang regulasyon ang gobyerno sa importasyon ng nasabing equipment dahil 2021 pa napaso ang isang kasunduan ng DOST, Department of Budget and Management at National Economic and Development Authority na nag uutos na inspeksyunin ang mga technology equipment na binibili ng gobyerno.

Sinabi naman ni DICT Undersecretary David Almirol, na wala silang kakayanan na magsuri dahil kulang ang kanilang pondo at mga tauhan kaya hindi na mamaximize ang kanilang cybersecurity bureau.

Binigyang diin naman ni Anti – Red Tape Authority o ARTA OIC Rabindranath Quilala , na dapat sinusuri ng NGCP ang mga piesa at kagamitan mula sa China at dapat itong pag-aralan.

Iginiit naman ni Sen. Tulfo, na hindi kailangang bumili ng equipment sa China at kung meron man, dapat isoli na ito.

Pinakakansela ni Chief Presidential legal counsel at dating Senate President Juan Ponce Enrile, ang lahat ng negosyo sa Pilipinas at huwag bigyan ng permit ang tinaguriang “Sibuyas Queen” na si Lilia o Leah Cruz.

Binigyang-diin ito ni Enrile matapos mabunyag sa imbestigasyon sa kamara na ang mga kumpanyang pag-aari umano ni Cruz, ang nasa likod ng kartel ng sibuyas sa bansa.

Ito, anya, ang dahilan kaya nagagawang kontrolin ang presyo ng sibuyas sa mga pamilihan.

Ayon kay Manong Johnny, kung siya ang tatanungin sa nagmamahal na namang sibuyas, kaniyang kakanselahin ang lahat ng negosyo ni Cruz at hindi bibigyan ng permit na makapagnegosyo sa bansa.

Iginiit ng Dating Senador na dinadaya ni Cruz ang buong bansa at ibinubulsa ang lahat ng pera habang nahihirapan ang publiko dahil sa mataas na presyo ng nasabing produkto.

Nagtataka si Enrile kung bakit nakakapag-negosyo pa rin si Cruz gayong lumitaw sa imbestigasyon na ilang beses na itong nahuli pero hindi nagtatagumpay ang kaso sa korte.

Ipatutupad na ngayon Martes, Mayo a-dos, ang bawas-singil sa presyo ng produktong petrolyo.

 Sa abiso ng mga kumpaniya ng langis, maglalaro sa piso at limampung sentimo hanggang piso at walumpung sentimo ang magiging tapyas sa kada litro ng gasolina.

 Aabot naman sa piso at dalawampung sentimo hanggang piso at limampung sentimo ang ibabawas sa presyo ng kada litro ng diesel habang piso at diyes sentimo hanggang piso at apatnapung sentimo naman sa kada litro ng kerosene.

 Ayon sa Department of Energy, ang paggalaw sa presyo ng langis ay bunsod ng pabagu-bagong singil ng mga international oil company sa pandaigdigang merkado.

Bumaba na ang presyo sa kada kilo ng manok, baboy, at gulay sa ilang pamilihan sa Metro Manila.

Sa pag-iikot ng DWIZ sa Marikina Public Market, bumaba ng halos 40 piso ang presyo sa kada kilo ng manok kung saan, mula sa dating 170 hanggang 180 pesos kada kilo, bumaba na ito sa 146 pesos per kilo.

Nabawasan naman ng mahigit 20 piso ang kada kilo ng baboy kung saan, mula naman sa dating 380 pesos kada kilo, bumaba na ito sa 360 pesos.

Ganito din ang naging presyuhan sa Pasig City Public Market kung saan, bumaba naman ang halaga ng mga gulay.

Ang mga talbos at kakong na dating bente pesos kada tali ay mabibili nalang sa 10 piso.

Nasa 35 hanggang 40 pesos naman ang presyo ng kada kilo ng sayote habang 15 pesos naman per kilo ang kamatis.

Mabibili din sa halagang bente pesos ang kada tatlong piraso ng sibuyas at bawang.

Para naman sa mga nagtitipid at kaunti kung bumili, maaari nang makabili nang hanggang 10 piso kada 1/4 sa siling pula at berde o yung pang-sigang.

Ayon sa mga mamimili, malaking tulong ang mababang presyo ng bilihin sa merkado dahil mas mapapagaan nito ang kanilang gastusin.

Nag-sorry ang Department of Transportation sa mga pasaherong naantala ang biyahe bunsod ng power outages sa Ninoy Aaquino International Airport.

 Ayon kay DOTR Secretary Jaime Bautista, hindi na mauulit ang insidente na nagdulot ng malalang kanselasyon sa domestic flights ng mga pasahero.

 Sinabi ng kalihim na nakikipag-ugnayan na sila sa electric power distribution company na Meralco, kaugnay sa naturang usapin.

 Bukod pa dito, magsasagawa rin ng technical assessment ang Manila International Airport Authority katuwang ang Meralco, sa tulong na rin ng independent third party expert upang matukoy ang sanhi ng power interruption sa paliparan.

 Samantala, siniguro naman ni Secretary Bautista na nakahanda ang mga power generator sa mga paliparan sakaling muling magkaaberya sa NAIA.

Nag-iinspeksiyon na ang mga tauhan ng Department of Transportation at Manila International Airport Authority kasunod ng naitalang aberya sa Ninoy Aquino International Airport kahapon.

 Nabatid na naantala ang biyahe ng mga pasahero bunsod ng power outage na tumagal ng halos walong oras.

 Ayon kay DOTR Secretary Jaime Bautista at MIAA General Manager Cesar Chiong, kanila nang iniimbestigahan ang aberya sa mga pasilidad ng naia at inaalam narin ang sitwasyon ng mga pasaherong naantala ang flights.

 Sa ngayon balik na sa normal na operasyon ang mga biyahe sa naturang paliparan.