Angelica Doctolero

Mayorya ng mga filipino o 69% ang nagsabing nahihirapan silang maghanap ng trabaho ngayong panahon.

Batay ito sa Social Weather Stations (SWS) survey noong unang quarter ng taon.

Sa naturang survey, 11 % ang nagsabing madali ang paghahanap ng trabaho ngayon habang 16 percent ang alanganin at 4 %ang walang reaksyon.

Ipinunto rin ng SWS Sa survey results na mahirap na ang paghahanap ng trabaho simula pa noong 2011.

Samantala, 50% naman ang naniniwalang mas marami pang trabahong magiging available sa susunod na isang taon.

Hinahanapan ng ebidensya ni Dating Presidential Spokesperson Atty. Harry Roque, ang mga suspek sa degamo slay case matapos umatras sa kanilang naunang salaysay.

Matatandaang sinabi ng mga suspek na sila’y tinorture at pinagbantaan ng mga tauhan ng Philippine National Police, para idiin sa kaso si Congressman Arnolfo Teves Jr.

Ayon kay Atty. Roque, dapat depensahan ng mga suspek ang kanilang naging testimonya at ipakita ang mga ebidensya kung totoo ba na sila’y tinorture ng mga pulis.

Iginiit pa ng dating opisyal na maituturing na isang uri ng krimen ang alegasyon ng mga suspek laban sa PNP.

Nilinaw ng Philippine Competition Commission na wala silang balak magtakda ng cap sa bilang ng mga motorsiklo na papayagang maging motorcycle taxi.

Ito ang inihayag ng PCC sa joint hearing ng senate committee on public services at local government na tumalakay sa panukalang i-regulate at gawing legal ang motorcycles-for-hire para matiyak ang kanilang kaligtasan, maging epektibo at abot-kayang uri ng pampublikong transportasyon.

Ayon kay PCC Executive Director Kenneth Tanate, malaking tulong kung mahihikayat ang mas marami pang players na pumasok sa lumalaking motorcycle taxi industry, na pakikinabangan ng mga commuter.

Sa kasalukuyan, 45,000 palang ang motorcycle for hire na bumibiyahe sa mga lansangan sa metro manila, kabilang na dito ang angkas, joyride at move it kung saan, plano ng dotr na isama ang grab.

Suportado naman ni Senate Committee on Public Services Chairman Senator Grace Poe, ang pagsasalegal ng motorcycles-for-hire na magbibigay ng mas maraming opsyon sa mga pasahero para sa mas mabilis na paraan ng transportasyon.

Mas palalakasin ng Armed Forces of the Philippines ang kanilang monitoring o pagbabantay sa mga pulis at sundalong masasangkot sa iligal na gawain.

Kasunod ito ng balitang may mga Private Armed Groups (PAGs) ang ginagamit at pinopondohan ng ilang mga politiko para sa kanilang pansariling interes.

Bukod pa dito, halos 50 PAGs din ang napag-alaman na nakatakdang ideploy sa kasagsagan ng Barangay at Sangguniang Kabataan Elections (BSKE).

Ayon sa AFP, mas lalo silang maghihigpit sa kanilang mga tauhan, lalo na yung mga pulis at sundalong nagretiro at wala na sakanilang serbisyo.

Matatandaang sa naging pagdinig sa senado, ilang senador ang uminit ang ulo at nagpahayag na dapat patawan ng parusang kamatayan ang mga pulis at sundalong mapapatunayang sangkot sa iligal na gawain ng isang politiko.

Iginiit ni AFP Spokesperson col. Medel Aguilar, na nakikipagtulungan na sila sa PNP na may kakayahan sa pagpapatupad ng batas, para bantayan ang mga lugar gaya ng Central Luzon, Bicol, Western Visayas, Caraga, Cordillera Administrative Region, at Bangsamoro Autonomous Region in Muslim Mindanao para magbigay ng seguridad sa nalalapit na halalan.

Nagsimula na ang Department of Migrant Workers sa pamamahagi ng ayuda para sa mga overseas filipino workers na naapektuhan ng entry ban sa Kuwait.

Aabot sa 815 na OFWs ang apektado ng VISA suspension kung saan, P30,000 tulong pinansyal ang ibinigay ng DMW sa unang batch ng mga apektadong pinoy workers.

Nabatid na nasa limampung OFWs ang kasama sa unang batch na nakatanggap ng ayuda na bibigyan din ng job matching o panibagong oportunidad na makapagtrabaho sa ibang bansa.

Ayon sa DMW, patuloy silang nakikipag-ugnayan sa mga recruitment agencies para makapagbigay ng panibagong trabaho sa mga apektadong OFWs.

Sa ngayon wala pang katiyakan kung hanggang kailan ang suspension sa Kuwait pero umaasa ang pamahalaan na magbubunga ang labor diplomacy ng pilipinas na magbibigay-daan sa mahinahon na pakikipag-usap sa Kuwait government.

Nanawagan sa Energy Regulatory Commission, si Senator Win Gatchalian, na patawan ng parusa ang National Grid Corporation of the Philippines, dahil sa naantalang mga proyekto sa kanilang transmission na nakaapekto sa suplay ng kuryente sa ilang lugar sa bansa partikular na sa Luzon grid.

Kasunod ito ng pahayag ni ERC Chairperson Monalisa Dimalanta, sa naging pagdinig sa Senate Committee on Energy na mahigit 70 transmission project ang kasalukuyang naantala kasama na rito ang anim na proyekto na itinuturing bilang national significance.

Ayon kay Sen. Gatchalian, dapat parusahan at pagmultahin ang NGCP upang madisiplina at maitama ang kanilang pagbibigay serbisyo sa publiko.

Iginiit ng senador na hindi dapat isawalang bahala ang naantalang mga serbisyo ng NGCP na hanggang ngayon ay hindi parin napapanagot dahil wala pang ipinapataw na kaukulang parusa.

Hinimok din ng mambabatas ang ERC na repasuhin ang rate-setting methodology pagdating sa transmission projects ng NGCP dahil 40 taon nang naantala ang proyekto kung saan, posibleng naaabuso na ng korporasyon, ang paninigil o pangongolekta sa mga konsyumer.

Binigyang diin ng Armed Forces of the Philippines na maaaring gamitin ang mga itinayong pasilidad sa ilalim ng Enhanced Defense Cooperation Agreement laban sa banta ng paparating na typhoon Mawar.

Matatandaang sinabi ng PAGASA Weather Bureau, na inaasahang papasok mamayang gabi o bukas ng umaga ang super typhoon mawar, na magdadala ng mga pag-ulan sa ilang lugar sa bansa partikular na sa Southern Luzon, at Visayas.

Ayon kay AFP  spokesperson col. Medel Aguilar, sakaling maglunsad ang ahensya ng humanitarian assistance and disaster relief operations, makakatulong ang EDCA  sites sa preposition ng relief goods na ibibigay para sa mga maaapektuhan ng naturang bagyo.

Kabilang sa mga nakumpletong EDCA sites ay matatagpuan sa basa air base sa Floridablanca, Pampanga at dalawa sa Antonio Bautista air base sa Puerto Princesa, Palawan.

Pinag-aaralan na ng gobyerno na gumawa ng sariling agricultural machineries na tutulong para mapa-unlad ang mga kagamitan at pasilidad ng mga magsasaka sa bawat lalawigan sa bansa.

Ayon sa Philippine Center for Postharvest Development and mechanization o PHILMECH ng DA, sinisimulan na nila ang pagpapatayo ng mga agricultural machinery design and prototyping center kung saan, gagawin ang mga makinarya sa tulong ng Korea International Cooperation Agency.

Kumpiyansa si PHILMECH Director IV Dr. Dionisio Alvindia, na mas matutulungan ang mga magsasaka na magkaroon ng sarili at de-kalidad na kagamitan na mas mura at mabilis magpaparami sa kanilang mga produkto.

Makapagbibigay din ito ng pag-asa tungo sa abot-kayang halaga ng mga produktong pang-agrikultura.

Bukod pa dito, lilikha din ito ng mas marami pang trabaho upang hindi na mangibang bansa ang ating mga kababayan.

Paiigtingin ng National El Niño team, ang ibat-ibang programa na makakatulong para mabawasan ang epekto ng El niño phenomenon o matinding tag-tuyot sa bansa.

Kasunod ito ng naging pahayag ng PAGASA Weather Bureau, kaugnay sa Typhoon Mawar na inaasahang papasok sa bansa ngayong linggo at papangalanang si bagyong Betty.

Kaugnay nito, nakaalerto na ang mga ahensya ng gobyerno kabilang na ang National Disaster Risk Reduction and Management Council mga regional counterparts, regional directors, maging ang iba’t ibang local government units, para ipatupad ang emergency preparedness at response protocols kabilang na ang dissemination of warnings, preparation of relief assistance, deployment ng rescue teams at iba pa.

Bukod pa dito, naghanda narin ang Department of Social Welfare and Development, Disaster Response Centers, National Resource Operations Center at ang Visayas Disaster Resource Center, nang halos 910,000 family food packs na nakatakdang ipamahagi sa mga lugar na tatamaan ng naturang bagyo.

Tiniyak naman ng NDRRMC ang 24-hours operation bilang na ang pagpapaigting sa pag-momonitor ng lagay ng panahon at kahandaan sakaling manalasa ang bagyo mawar sa bansa.

Sinertipikahan bilang urgent ni Pangulong “Bongbong” Marcos Jr., ang Maharlika Investment Fund Bill.

Ito’y upang madaliin ang pagpasa sa Maharlika Fund sa senado na hindi na kailangang dumaan pa sa 3-day rule.

Nais ng pangulo na maisabatas ito bago ang kanyang ikalawang State of the Nation Address sa Hulyo.

Target naman ng senado na aprubahan ang Maharlika Investment Fund Bill sa susunod na linggo.

Sinabi ng Department of Finance na ang panukalang batas ang magiging kauna-unahang sovereign investment fund ng bansa na layong isulong ang pag-angat ng ekonomiya at pag-unlad ng Pilipinas.