Angelica Doctolero

Patuloy sa pamamahagi ng tulong para sa mga biktima ng kalamidad sa Visayas at Mindanao ang Presidential Communications Office (PCO).

Katuwang ng PCO sa pamamahagi ng mga food at non-food items ang Department of Social Welfare and Development (DSWD) sa pamamagitan ng Field Office XI.

Kabilang sa mga nahatiran ng tulong ang mga pamilyang pinaka naapektuhan ng landslide partikular na sa Dolores, Eastern Samar at Brgy. Mainit, Maco, Davao de Oro na nakatanggap ng family food packs, hygiene kits, kitchen kits, sleeping kits at modular tents.

Umalalay din ang mga tauhan ng Bureau of Fire Protection (BFP) at Philippine National Police (PNP) para sa mas mabilis na pamamahagi ng ayuda sa mga nangangailangan.

Pinag-aaralan pa ng Department of the Interior and Local Government (DILG) at Philippine National Police (PNP) ang pagsasapubliko sa pangalan ng mga Pulis na mapapatunayang sangkot sa paggamit at pagbebenta ng iligal na droga sa bansa.

Kasunod ito ng 929 na bilang ng mga colonel at generals na nagsumite ng kanilang courtesy resignation bilang tugon sa panawagan ni Interior secretary Benjamin “Benhur” Abalos Jr. kung saan, 24 pa ang hinihintay para sa kanilang resignation call.

Kabilang sa mga hindi pa nakakapagsumite ang mga matataas na opisyal na nakatalaga sa Visayas at Mindanao.

Nabatid na wala pang malinaw na pag-uusap at hindi pa buo ang desisyon ng dalawang ahensya kaugnay sa planong pagsasapubliko sa pangalan ng mga Narco Cop.

Matatandaang, una nang sinabi ni PNP Chief PGEN. Rodolfo Azurin Jr., na sang-ayon siyang isapubliko ang pangalan ng mga pulis na sangkot sa illegal drug trade pero nakadepende parin ito kung papayagan ng evaluation committee at national police commission.

Aminado ang DILG at PNP na wala pa silang hakbang sa mga natitira pang police officers na magmamatigas at hindi tatalima sa kanilang panawagan na tatagal lang hanggang sa January 31.

Pumalag ang Department of Justice (DOJ) kaugnay sa naging pahayag ng human rights group na wala umanong nagbago sa sitwasyon ng iligal na droga at karapatang pantao mula nang manungkulan bilang pinuno ng bansa si Pangulong Ferdinand “Bongbong” Marcos Jr.

Ayon kay Justice secretary Crispin Remulla, magkakaiba umano ang paraan ng Administrasyong Marcos pagdating sa pakikipaglaban sa iligal na droga.

Sinabi ni Remulla na maaaring namang kausapin ang Philippine National Police (PNP) hinggil sa kanilang metodolohiya o pamamaraan sa pagsugpo ng iligal na droga kung saan, kanila ding iba-validate ang ulat o impormasyong inilabas ng nasabing grupo.

Iginiit din ni Remulla na nakatutok ang gobyerno sa mga kaso katulad ng extrajudicial killings kung saan, nagpapatuloy pa ang imbestigasyon at pagdinig sa naturang kaso.

Planong ibaba ng Department of the Interior and Local Government (DILG) ang courtesy resignation policy sa mga barangay official sa ibat-ibang lugar bansa.

Ito’y matapos ang naging panawagan ni Interior secretary Benhur Abalos Jr. na magsumite ng courtesy resignation ang nasa mahigit 950 colonels at generals.

Kasunod ito ng pagkakasangkot ng ilang tauhan ng Philippine National Police (PNP) sa illegal drug trade dahilan para isailalim sa Anti-Illegal Drug Campaign ang mga nabanggit na bilang ng mga opisyal sa hanay ng pulisya.

Ayon kay Abalos, kanilang kinokonsidera ang pagsailalim sa evaluation ng lahat ng opisyal ng pamahalaan kaugnay sa isyu ng iligal na droga na isa sa malaking problema sa Pilipinas.

Sinabi ni Abalos na kaniyang gagawin ang makakaya para sa katahimikan at kapayapaan ng bansa kung saan, maging siya ay handang isuko ang sarili sa imbestigasyon kung kinakailangan.

Nananatiling positibo ang mga economic expert sa pagdalo ni Pangulong Ferdinand “Bongbong” Marcos Jr. sa world economic forum sa Davos, Switzerland.

Ayon kay Carlos Sorreta, Undersecretary ng Department of Foreign Affairs (DFA), si Pangulong Marcos lamang ang tanging lider mula sa ASEAN ang magtutungo sa nasabing bansa para sa high-level dialogue session.

Sinabi ni Sorret, na kabilang sa mga ibibida ni PBBM sa mga global leader at mga chief executive officer, ang global nutrition, Maharlika investment fund at mataas na economic performance ng Pilipinas.

Bukod pa dito, maari ding talakayin ng pangulo ang tourism industry at ang madaling proseso ng pamumuhunan sa bansa.

Samantala, sa naging pahayag naman ni Economic Analyst Dr. Michael Batu, malaking tulong ang ginawang pakikilahok at pagbisita ng pangulo sa Davos forum para mapanatili ang matatag na ugnayan ng Pilipinas sa iba’t-ibang mga bansa at mai-promote ang interest ng Pilipinas sa mga world leader at mga negosyante.

Bukod pa dito, malaki din ang tiyansa na makapag-uwi ang pangulo ng investment pledges dahil sa pagsali nito sa naturang forum.

Umaasa naman ang mga eksperto na mas dadami ang darating na foreign direct investment na makakatulong sa mga programa ng pamahalaan.