Angelica Doctolero

Nakatakdang maglabas ng El niño advisory ang Philippine Atmospheric, Geophysical And Astronomical Services Administration, sakaling marating ng klima ang “Full Blown” na kondisyon nito.

Ayon kay PAGASA Officer-in-Charge Dr. Esperanza Cayanan, nasa ilalim ng El niño alert ang ahensya, dahil sa inaasahang pagtama ng El niño sa bansa ngayong taon.

Sinabi ni OIC Cayanan, na mararamdaman ang epekto ng El niño kapag hindi na normal ang pag-ulan at posibleng tumaas ang kundisyon nito sa huling quarter ng 2023 at unang quarter ng taong 2024.

Iginiit ng PAGASA na posibleng makaranas ng matinding tag-tuyot ang ilang bahagi ng bansa, habang inaasahan naman ang above normal na pag-ulan  sa kanlurang bahagi ng bansa.

Samantala, nagpaalala naman sa publiko ang PAGASA Weather Bureau, na panatilihing maging alerto at maghanda sa posibleng epekto ng El niño.

Sinimulan na ng Department of Labor and Employment ang profiling para sa emergency employment ng mga residenteng apektado ng patuloy na pag-aalburoto ng Bulkang Mayon sa Albay, Bicol Region.

Ayon sa DOLE, nasa P50-M  halaga ng pondo ang naiturn-over sa mga local government unit na ilalaan para sa mga naapektuhan ng abnormal na aktibidad ng naturang bulkan.

Ang nasabing pondo ay bahagi ng Tulong Panghanapbuhay Sa Ating Disadvantaged/Displaced Workers o TUPAD Program kung saan, ang isang miyembro ng apektadong pamilya ay babayaran ng halos P 11,000 para sa 30 days nilang pagseserbisyo.

Kabilang sa serbisyong alok ng DOLE ang community gardening o pagtatanim ng gulay malapit sa evacuation centers, paglilinis at maintenance ng pansamantalang evacuation centers, maging ang housekeeping at paghahanda ng pagkain.

Mas pinalakas ng Department of Agriculture ang produksiyon ng Agricultural Products sa bansa.

Ito ang inihayag ni Pangulong Ferdinand “Bongbong” Marcos Jr., na ginagawa na ng Da ang ibat-ibang hakbang upang pataasin ang produksiyon na magpapaganda sa ekonomiya ng Pilipinas.

Layunin din nitong mapababa sa abot-kayang halaga ang presyo ng mga local product sa ibat-ibang pamilihan sa Metro Manila.

Ayon kay Pangulong Marcos, dahil sa inflation, napipilitan ang bansa na mag import ng produkto kung saan, nakikipag-ugnayan na siya sa mga opisyal ng DA maging sa mga pribadong sektor para pagtuunan ng pansin ang mga programa ng pamahalaan na magpapalakas sa produksiyon ng mga produkto.

Sa kabila nito, tiniyak ni pbbm, na patuloy na isusulong ng DA, ang agri-fishery practices, pagandahin ang competitiveness ng agri-fishery products, at lalong mapalago ang kita ng mga Pilipinong magsasaka at mangingisda.

Inihihirit sa pamahalaan ng Department of Migrant Workers (DMW) na dagdagan ang sweldo at benepisyo ng mga Filipino nurses sa bansa.

Binigyang diin ng DMW, na ang mababang sahod ang tumutulak sa mga Pinoy Nurses para mapilitang magtrabaho sa ibang bansa.

Kasunod narin ito ng pagpapakita ng interes ng 6 na malalaking bansa na planong mag-hire ng maraming bilang ng mga nurse sa Pilipinas.

Kabilang sa mga bansang nais kumuha ng mga nurse ang United States, Saudi Arabia, Austria, Singapore, Japan at Germany na may magandang benepisyo at malaking sahod na tutugon sa pangangailangan ng mga healthcare workers.

Iginiit ng DMW, na kailangang masolusyonan ang problema ng mga healthcare workers upang mapigilan ang posibleng kakulangan ng mga nurse sa bansa.

Pinag-aaralan na ng gobyerno ang planong pagkuha ng “Board Eligibles” upang tugunan ang malaking kakulangan ng mga nurse sa pampublikong ospital sa bansa.

Ayon sa Health Secretary Teodoro Herbosa, tinitignan na nila ang mga college graduates na hindi pa nakakapasa sa board exam at pwedeng ma-hire ng gobyerno kahit walang lisensya.

Aminado ang kalihim na nasasayang ang pinaghirapan ng mga aspiring nurse at napupunta nalang sa iba’t ibang career works gaya ng BPO industry, at tourism sector.

Sa pinaka huling datos ng DOH, 4,800 na mga nurse ang kailangan pa sa mga pampublikong ospital sa bansa.

Namahagi ng donasyon ang bansang apan sa mga magsasaka sa ilang lalawigan sa bansa.

Layunin nitong maitaguyod ng mga farmer ang kanilang sariling produkto sa pamamagitan ng mga refrigerated trucks mula sa naturang bansa.

Ayon sa embassy of Japan in the Philippines, kabilang sa mga nakatanggap ng refrigerated trucks ang Rizal, Laguna, at Antique na magpapatipid sa gastusin ng mga magbubukid kabilang na ang transportasyon, oras ng paghahatid, at kalidad ng produkto.

Pinangunahan ng isang non-government organization ang pamamahagi ng tulong ng bansang Japan, na inaasahang sasalo sa pasanin; kokontrol sa gastos; at magpapataas ng kita ng mga magsasaka.

Nakatakdang maglunsad ng ibat-ibang proyekto ang Bureau of Fisheries and Aquatic Resources para sa mga mangingisdang nakatira malapit sa West Philippine Sea.

Ayon kay BFAR Chief Information Officer Nazario Briguera, naglabas ang gobyerno ng P80-M para sa paglalaan ng livelihood project na tatawaging “Layag WPS” o “Layag West Philippine Sea.”

Layunin ng hakbang na tulungan ang bawat aktibidad ng mga mangingisda na magpapaangat sa ekonomiya ng bansa.

Binigyang diin ng opisyal, na bukod sa mga lugar na malapit sa WPS, sakop din ng kanilang programa ang mga lalawigan mula sa Ilocos Region, Central Luzon, at MIMAROPA.

Pinatitiyak sa Philippine National Police ni Deputy Speaker at Las Piñas Rep. Camille Villar, ang mahigpit na pagpapatupad sa paggamit ng mga body camera at dashcams sa operasyon ng mga police personnel.

Ito’y upang matukoy at mapanagot sa batas ang mga pulis na lalabag sa gitna ng kanilang operasyon at masiguro ang transparency maging ang accountability ng bansa.

Kasunod narin ito ng pagkakasangkot ng ilang matataas na police official sa nakumpiskang P6.7-B  na halaga ng iligal na droga sa Tondo, Maynila noong nakaraang taon.

Sa inihaing House Bill no. 8352 ni Congresswoman Villar, ang mga maire-record na footage mula sa mga body cameras at police dashcams ay magagamit bilang ebidensya sa mga operasyon ng pambansang pulisya.

Binigyang diin pa ng mambabatas na isa ito sa mga paraan upang magkaroon ng pananagutan ang mga otoridad sa kanilang mga aksyon kabilang na ang pang-aabuso o pamumwersa sa taumbayan.

Nangako si Health Secretary Teodoro Herbosa, na kaniyang tutulungan sa abot ng makakaya ang mga nurse na hindi nakapasa sa kanilang board exam.

Ayon sa kalihim, kakaunti lamang na mga nurse sa bansa, ang nakapasa sa qualifying test ng pamahalaan at ang ilan sa mga bumabagsak ay napipilitan na lamang lumilipat ng ibang career at trabaho.

Sinabi ni Sec. Herbosa, na kaniyang hihikayatin ang Professional Regulatory Commission, na magbigay ng pansamantalang lisensya sa mga hindi nakapasang nurse, upang mabigyan sila ng pagkakataon na makapagserbisyo sa mga public hospital.

Kumpiyansa ang kalihim ng DOH, na kaniyang mapupunan ang nasa 4,500 na bakanteng posisyon para sa mga nurse sa pamamagitan ng pagtulong sa mga ito na makapasa sa board exams kung saan, may ilang private sector na ang nag-alok ng sponsorship sa nursing board exam review ng mga nursing graduates.

Tiwala ang National Irrigation Administration na maaabot ng Pilipinas ang mahigit 90% ng Rice self-sufficiency sa taong 2028.

Ito ang inihayag ni NIA Acting Administrator Eduardo Guillen, na patuloy nilang hihikayatin ang mga magbubukid na magtanim ng hybrid rice para sa mas maayos na produksiyon nito sa bansa.

Ayon kay Administrator Guillen, matakaw man sa tubig ang hybrid rice at medyo may kamahalan ang produksyon, mas maeengganyong magtanim ang mga magsasaka kung sapat ang suportang natatanggap ng mga ito mula sa gobyerno.

Tiniyak naman ni Administrator Guillen, ang mga programa para sa mga farmer maging ang pagbibigay ng mga makinarya para maiproseso ang kanilang mga inaning produkto na planong ibenta sa mga pamilihan sa Metro Manila.