Angelica Doctolero

Naging mapayapa ang pagdiriwang ng ika-125 anibersaryo ng araw ng kalayaan na ikinasa kahapon sa Rizal National Monument sa Maynila at grand parade sa Quirino grandstand.

Ayon kay Philippine National Police-Public Information Office Bgen. Red Maranan, generally peaceful ang selebrasyon ng Independence Day at walang naitalang untoward incident ang pambansang pulisya.

Sinabi ni Bgen. Maranan, na maayos ang ikinasang kilos-protesta ng mga raliyista at naipahayag ang kani-kanilang saloobin at nais iparating sa pamahalaan.

Kasabay nito, kinilala ni PNP Chief General Benjamin Acorda Jr., ang mga pulis na nagsakripisyo at patuloy na naglilingkod sa bansa at sa taumbayan.

Hinimok din ng PNP chief, ang kaniyang mga tauhan maging ang publiko na itaguyod ang diwa ng pagkakaisa bilang pagbibigay parangal at pasasalamat sa lahat ng mga bayaning nag-alay ng kanilang buhay para sa bansa.

Isinailalim na sa emergency health situation ang Ilocos Norte bunsod ng pagtaas ng bilang ng kaso ng rabies sa lalawigan.

Nabatid na pumalo na sa 53 barangay ang positibong may kaso ng rabies kabilang na ang Batac City,  Laoag  City, Paoay, San Nicolas, at Badoc.

Ayon kay  Dr. Loida Valenzuela, Provincial Veterinarian ng lalawigan, tumataas ang kaso ng rabies na nakukuha mula sa kagat ng aso kung saan, kailangan nang palawigin ang pagbabakuna o ang pagtuturok ng anti-rabies upang mapigilan ang pagkalat nito sa probinsya.

Sa pinaka huling datos ng lokal na pamahalaan ng lalawigan, 66,000 na aso ang kailangang mabakunahan ng anti-rabies.

Bukod pa dito, kailangan din ng multi-agency approach na binubuo ng mga pulis at mga may-ari ng alagang hayop, upang hindi na tumaas pa ang kaso ng rabies sa Ilocos Norte.

Binigyang diin ni suspended Congressman Arnolfo Teves Jr. na hindi niya uurungan ang hamon ni Justice Secretary Jesus Crispin Remulla, na umuwi na ng bansa at harapin ang mga kasong ibinabato laban sakaniya.

Ayon sa suspendidong mambabatas, uuwi lamang siya ng Pilipinas, kung tama nitong masasagot ang kaniyang tanong kaugnay sa kung papaano nagkasya ang labing tatlong katao sa isang 9-seater na eroplano at kung paano nagkasya ang anim na pasahero kasama na ang piloto sa isang 5-seater na helicopter.

Iginiit ni Cong. Teves, na walang ebidensiya ang Doj na nag-apply siya ng citizenship sa Timor Leste, dahil inililihis lamang ng ahensya ang usapin para lalo siyang madiin sa kaso.

Dagdag pa ng suspendidong kongresista, na may mga intel personnel sa pilipinas ang kumu-contact sa gobyerno ng Timor Leste, para alamin ang kaniyang kinaroroonan.

Epektibo na bukas ang taas-singil sa presyo ng produktong petrolyo matapos ang naging rollback noong nakaraang linggo.

Ayon sa ilang kumpaniya ng langis, maglalaro sa P1.20 hanggang P1.50 ang magiging dagdag sa presyo ng kada litro ng diesel.

Nasa P1.10 hanggang P1.40 naman ang magiging taas-singil sa kada litro ng gasolina at kerosene.

Batay sa pagtaya ng Department of Energy, ang paggalaw sa presyo ng produktong petrolyo ay bunsod ng mataas na singil sa kada bariles ng langis ng mga OPEC countries partikular na ng Saudi Arabia.

Aabot sa 5,000 magsasaka ang naapektuhan ng pag-aalburoto ng bulkang Mayon sa Bicol Region.

Ito ang inihayag ni Provincial Agriculturist Cheryl Rebeta, na pinaka-apektado ang mga lugar na sakop ng 6-kilometer radius permanent danger zone.

Kabilang sa mga lugar na apektado ng abnormal na aktibidad ng bulkan ang Camalig, Daraga, Guinobatan, Ligao City, Malilipot, Tabaco City, Sto. Domingo, Bacacay at Legazpi City na nangangamba sa kanilang hanapbuhay sakaling itaas pa ang alert level status sa bulkang Mayon.

Ayon sa mga magsasaka, mas lalong liliit ang kanilang kita dahil malaking bahagi ng kanilang sakahan ang maaaring maapektuhan sakaling sumabog ang naturang bulkan.

Dahil dito, nagsagawa na ng imbentaryo ang mga magsasaka na inaasahang mabibigyan ng ayuda o tulong mula sa lokal na pamahalaan.

Tiniyak ng Office of Civil Defense (OCD) na sapat ang suplay ng tubig sa mga residenteng apektado ng pag-alburoto ng Bulkang Mayon sa Bicol Region.

Ayon kay Diego Agustin Mariano Head ng OCD Joint Information Unit, naglagay na sila ng mga water filtration na tutugon sakaling kulangin ang mga portable water at malinis na tubig na maiinom ng mga residenteng nagsilikas.

Nakikipag-ugnayan narin ang ahensya sa OCD-5 upang matukoy at matugunan ang iba pang pangangailangan ng evacuees kabilang na ang malinis na palikuran, kuryente, at maayos na bentilasyon sa mga evacuation centers.

Batay sa datos ng National Disaster Risk Reduction and Management Council aabot sa kabuuang 3,538 pamilya o katumbas ng 12,804 na indibidwal ang inilikas dahil sa patuloy na pag-aalburoto ng Bulkang Mayon.

Sa ngayon, aabot na sa halos P7-M halaga ng family food packs ang ipinamahagi ng OCD na binubuo ng mga bottled water, family tents, hygiene kits, at iba pa.

Kinontra ng bagong kalihim ng Department of National Defense ang mungkahing ibalik ang kasunduan sa pagitan ng ahensiya at ng University of the Philippines.

Matatandaang nagsimula noong 2021, ang UP-DND  accord kung saan, kailangan munang humingi ng pahintulot mula sa paaralan bago magsagawa ng operasyon ang mga police at military personnel sa loob ng UP Campuses.

Mariin namang tinutulan ni Defense Secretary Gilbert “Gibo” Teodoro Jr., ang isinusulong na batas dahil tanging ang U.P. lang ang mayroong kasunduan sa pagitan ng dnd kahit marami namang pampublikong paaralan sa bansa.

Tiniyak naman ng Defense Secretary na kaniyang susuportahan ang mungkahi sakaling maisabatas at lagdaan na ni Pangulong Ferdinand Marcos Jr., ang panukala.

Muling nagkasundo ang Pilipinas at Singapore na patatagin ang relasyon sa kalakalan at pamumuhunan.

Ito’y matapos ang bilateral meeting sa Malacañang nina Pangulong Ferdinand “Bongbong” Marcos Jr. at Ambassador-Designate to the Philippines of Singapore Constance See Sin Yuan.

Ayon kay Pangulong Marcos, mayroon nang malalim na kasaysayan ang Pilipinas at Singapore sa ibat-ibang larangan ng mutual interest na may layuning maipagpatuloy ang kaunlaran sa nakalipas na 5 dekada.

Binigyang diin ng Pangulo na matatag ang ugnayan ng dalawang bansa kung saan, nananatili ang Singapore bilang isa sa pinakamahalagang kasosyo sa kalakalan at pamumuhunan ng Pilipinas.

Naitatag noong 1969 ang active bilateral ties ng dalawang bansa na may layuning paigtingin ang sektor ng edukasyon, magkaroon ng palitan ng kultura, at masiguro ang depensa at seguridad laban sa terorismo at national crimes.

Patuloy ang degassing activity ng Taal volcano kung saan, lalo pang lumawak ang sakop ng sulfur dioxide emission o yung ibinubugang asupre nito na umabot na sa Taal Caldera.

Sa eksklusibong panayam ng DWIZ, sinabi ni Eric Arconado, OIC resident volcanologist ng taal volcano, na delikado para sa mga residente ang ibinubugang asupre ng naturang bulkan, dahil posible itong magdulot ng ibat-ibang uri ng sakit.

Ayon kay Arconado, patuloy nilang binabantayan ang sitwasyon ng bulkang Taal kung saan, nakabatay sa abnormal na aktibidad ng bulkan ang pagpapatupad ng alert level status.

Aminado si Arconado, na nag-iba ang behavior ng bulkang taal, matapos ang pagsabog nito noong taong 2020.