Angelica Doctolero

Muling nagkasundo ang Pilipinas at Singapore na patatagin ang relasyon sa kalakalan at pamumuhunan.

Ito’y matapos ang bilateral meeting sa Malacañang nina Pangulong Ferdinand “Bongbong” Marcos Jr. at Ambassador-Designate to the Philippines of Singapore Constance See Sin Yuan.

Ayon kay Pangulong Marcos, mayroon nang malalim na kasaysayan ang Pilipinas at Singapore sa ibat-ibang larangan ng mutual interest na may layuning maipagpatuloy ang kaunlaran sa nakalipas na 5 dekada.

Binigyang diin ng Pangulo na matatag ang ugnayan ng dalawang bansa kung saan, nananatili ang Singapore bilang isa sa pinakamahalagang kasosyo sa kalakalan at pamumuhunan ng Pilipinas.

Naitatag noong 1969 ang active bilateral ties ng dalawang bansa na may layuning paigtingin ang sektor ng edukasyon, magkaroon ng palitan ng kultura, at masiguro ang depensa at seguridad laban sa terorismo at national crimes.

Patuloy ang degassing activity ng Taal volcano kung saan, lalo pang lumawak ang sakop ng sulfur dioxide emission o yung ibinubugang asupre nito na umabot na sa Taal Caldera.

Sa eksklusibong panayam ng DWIZ, sinabi ni Eric Arconado, OIC resident volcanologist ng taal volcano, na delikado para sa mga residente ang ibinubugang asupre ng naturang bulkan, dahil posible itong magdulot ng ibat-ibang uri ng sakit.

Ayon kay Arconado, patuloy nilang binabantayan ang sitwasyon ng bulkang Taal kung saan, nakabatay sa abnormal na aktibidad ng bulkan ang pagpapatupad ng alert level status.

Aminado si Arconado, na nag-iba ang behavior ng bulkang taal, matapos ang pagsabog nito noong taong 2020.

Inaasahang masisimulan na sa unang quarter ng susunod na taon ang pagsasapribado sa Ninoy Aquino International Airport.

Ayon kay Transportation Usec. For aviations and airports Roberto Lim, nagsumite na ng joint proposal sa National Economic Development Authority, ang kanilang departamento maging ang Manila International Airport Authority para sa Naia Public-Private Partnership Project.

Nakapaloob sa nasabing proposal, na magkakaroon ng labing limang taon na kontrata ang isang private concessionaire para sa pag-operate ng paliparan kung saan, walang aalisin sa serbisyo at mananatili sa kani-kanilang trabaho ang dati nang mga empleyado.

Ito’y dahil pagmamay-ari parin ng pamahalaan ang naia at tanging operations at management lang ang pribado.

Bukod pa dito, target ding isa-moderno ang air traffic control equipment, mabago ang runways maging ang taxiways at mapaunlad ang terminal facilities bago mai-turnover ang operasyon ng paliparan sa pribadong kumpaniya.

Nakatakdang ideploy ang 9,000 tauhan ng Philippine National Police bilang paghahanda sa paggunita ng Independence Day sa Hunyo 12.

Ang nasabing bilang ng PNP Personne, ay ipakakalat sa buong Metro Manila para masiguro ang seguridad at kaligtasan ng publiko.

Inaasahang mangunguna sa selebrasyon si Pangulong Ferdinand “Bongbong” Marcos Jr., na gaganapin sa Luneta Park.

Ayon kay PNP Spokesperson Col. Jean Fajardo, nakaalerto ang kanilang tauhan sakaling magkaroon ng kaguluhan dahil sa posibleng kilos protesta sa bawat mga lungsod.

Iginiit ng opisyal na mananatili at hindi magtataas ang alert level ang kanilang ahensya sa gitna ng selebrasyon dahil umaasa ang pnp na walang maitatalang gulo sa araw ng kalayaan.

Nanawagan din ng kooperasyon sa publiko ang ahensya para magampanan ang kanilang tungkulin na gawing maayos at mapayapa ang bansa.

Suportado ng Philippine Air Force, ang pagkakatalaga sa bagong kalihim ng Department of National Defense na si Secretary Gilbert “Gibo” Teodoro.

Ayon kay Air Force Spokesperson Col. Bon Nunag Castillo, umaasa ang kanilang ahensya na magagampanan ng bagong kalihim ang kaniyang tungkulin at matutugunan ang pangangailangan ng Paf para mas mapalakas ang puwersa ng kanilang ahensya.

Kumpiyansa si Col. Castillo, na magiging katuwang ng PAF ang kalihim sa pagbili ng mga makabagong kagamitan para sa kanilang mas maayos na serbisyo sa bansa.

Iginiit ng opisyal na buo ang kanilang tiwala kay Sec. Teodoro dahil sa malawak na karanasan nito sa iba’t ibang larangan kasama na ang pagbibigay malasakit sa taumbayan.

Tiwala rin ang PAF, na hindi sila bibiguin ng bagong kalihim dahil pamilya narin ang kanilang turing kay Secretary Teodoro, na isang Reserve Officer sa kanilang hanay.

Nanawagan ang Philippine Institute of Volcanology and Seismology sa mga residente ng Batangas na panatilihing maging alerto at kung hindi importante ang pupuntahan, ay huwag nang lumabas ng bahay.

Ito ang inihayag sa DWIZ, ni PHIVOLCS Dir. Teresito Bacolcol, dahil delikado sa kalusugan ng tao sakaling makalanghap ng sulfur dioxide o asupre na ibinubuga mula sa main crater ng Bulkang Taal.

Ayon pa kay Dir. Bacolcol, patuloy ang aktibidad ng Bulkang Taal kung saan, mahigit pitong libong tonelada kada araw ang ibinubuga nitong volcanic smog dahilan ng kanselasyon ng mga klase sa ilang lugar sa batangas.

Iginiit ni dir. Bacolcol, na tuluy-tuloy ang degassing activity ng taal volcano, pero bumaba na ang sulfur dioxide emission nito kumpara sa dating 9,391 tonelada kada araw na maaaring magresulta ng ibat-ibang uri ng sakit gaya ng ubo at pananakit ng lalamunan.

Binigyang diin ni Pangasinan 2nd District Rep. at Chairman ng Special Committee on Nuclear Energy Mark Cojuangco, na walang kinakalawang sa mahahalagang equipment ng Bataan nuclear power plant.

Ito ang inihayag ni Cong. Cojuangco, sa eksklusibong panayam ng DWIZ, na kaya namang palitan ang maliliit na kagamitan kung makitaan ito ng kalawang.

Matatandaang nagsagawa ng sanctional testing ang isang non-government organization kung saan, iginiit ng kongresista na isandaang porsyentong kumpleto at walang sira ang mga planta sa Bataan.

Ayon kay Cong. Cojuangco, taong 2010 pa nila nakausap ang ilang residente sa Bataan at sang-ayon ang mga ito na muling buhayin ang naturang planta, na lilikha ng mas maraming trabaho.

Iginiit naman ng kongresista na hindi pagmamay-ari ng mga taga-bataan ang nasabing planta kundi pagmamay-ari ng republika ng Pilipinas kung saan, ang totoong pangalan nito ay “Philippine Nuclear Power Plant.”

Hinimok naman ni Cong. Cojuangco ang pamahalaan, na huwag nang i-expand ang Bataan nuclear power plant at dagdagan nalang ng mga planta upang tugunan ang pangangailangan sa kuryente.

Inirekomenda ni House Ways and Means Chairman at Albay 2nd District Rep. Joey Salceda, sa Department of Social Welfare and Development na idirekta sa department of agriculture ang kanilang food stamp program.

Ito’y para mapalawak ang mga pamilihan sa bansa para sa mga local agricultural products at para matulungan ang mga magsasaka at mangingisda sa bansa.

Ayon sa kongresista, halos 30% sa mga local farmers, ang nananatiling mahirap kaya dapat magkaroon ng tie-up ang dalawang ahensya, kaugnay sa implementasyon ng programa.

Nabatid na una nang ipinatupad sa ibang bansa ang partnership sa mga ahensya na epektibong nakatutugon sa kahirapan ng bawat komunidad.

Iginiit ni Cong. Salceda, na ang pakikipagtulungan ng DSWD at DA ay makapagbibigay ng mas malaking kita sa mga magsasaka kung saan, hindi na sila mahihirapan sa pagbebenta ng kanilang mga inaning pananim.

Inaasahang malalagdaan na ni Pangulong Ferdinand “Bongbong” Marcos Jr., ang panukalang batas na tutugon o sasalo sa problema ng mga magsasaka sa mga lalawigan.

Ayon kay Senator Cynthia Villar, kung malalagdaan ni Pangulong Marcos ang New Agrarian Emancipation Act., mawawala ang utang ng mahigit 6,000 Agrarian Reform Beneficiaries.

Nabatid na aabot sa P57.5 –B ang kabuuang halaga ng utang ng Arb’s na may 1.2 million ektaryang lupaing pangsakahan.

Matatandaang nakapasa na sa kongreso ang naturang panukala at ngayon ay hinihintay na lamang na malagdaan ng Pangulong Marcos.

Sa ilalim ng panukala, isinusulong na alisin na o hindi na singilin ng interes sa utang ang mga beneficiaries mula sa ibinigay na agricultural lands sa ilalim ng Comprehensive Agrarian Reform Program.

Ipinababasura rin sa Department of Agrarian Reform ang lahat ng kaso ng mga benepisyaryo makaraang hindi makapagbayad sa kanilang utang.

Bukod pa dito, hindi rin pagbabayarin ng estate tax ang mga benepisyaryong magsasaka at ipagbabawal din na ibenta o ilipat ang lupa sa loob ng 20 taon maliban na lamang kung ibibigay ito sa land bank o gagawing pamana sa iba pang kwalipikadong benepisyaryo.

Binigyang diin ni Finance Secretary Benjamin Diokno, na magiging fully operational na ang maharlika investment fund sa bansa bago matapos ang taong 2023.

Ito’y matapos aprubahan ng kongreso ang pinagtibay na bersyon ng senado sa bicameral meeting na nakatakda namang aprubahan at pirmahan ni Pangulong Ferdinand “Bongbong” Marcos Jr. Bago ang kanyang ikalawang state of the nation address sa Hulyo 24.

 Ayon kay Diokno, sakaling maisabatas ang MIF, agad na ilalatag ang mga implementing rules and regulations, kasabay ng paghahanap ng mga opisyal na itatalaga sa Maharlika Investment Corporation.

Iginiit ng kalihim na ang Maharlika Investment Fund bill ang magpapanatili ng transparency, accountability, fund integrity, at mas matatag na risk management sa bansa.