Angelica Doctolero

Muling pinatawan ng 60 araw na suspensiyon sa kamara si Negros Oriental 3rd District Rep. Arnolfo Teves Jr., dahil sa kaniyang patuloy na pananatili sa ibang bansa at hindi pagharap sa mga alegasyong kinakaharap nito kaugnay sa degamo slay case.

Sa huling araw ng regular session ng 19th congress, nagdesisyon ang House Committee on ethics and priveleges, na muling suspindehin ang kongresista dahil sa kaniyang “Disorderly Behavior.”
Batay sa rekomendasyon ni House Ethics Chairman Felimon Espares, patuloy lamang na lumalabag si Cong. Teves, sa utos na umuwi na ng bansa para harapin at depensahan ang pagkakadawit ng kaniyang pangalan na itinuturong mastermind sa pagpatay kay Negros Oriental Gov. Roel Degamo at 9 na iba pa.

Bukod pa dito, forfeited din ang membership ni Cong. Teves sa komite kabilang na ang pagiging vice chairman nito sa committee on game and amusement at ang pagiging miyembro sa legislative franchises at nuclear energy committee.

Ang pagkakasuspinde kay Cong. Teves ay desisyon ng 285 na kongresista na pabor na i-adopt ng kamara ang rekomendasyon ng house committee on ethics and privileges.
Dahil dito, hindi pinapayagang makadalo sa mga meeting ang suspendidong mambabatas dahil sa kaniyang suspension.

Matatandaang, unang inihayag ng mambabatas na hindi siya uuwi ng bansa hanggat may mga banta sa kaniyang buhay at sa kaniyang pamilya.

Inaasahan ng Bangko Sentral ng Pilipinas ang patuloy na pagbulusok ng inflation sa Mayo o mananatili sa parehong antas noong abril sa gitna ng mababang presyo ng gasolina, pagkain at utility.

Batay sa kanilang forecast, inihayag ng B.S.P. Na posibleng umabot sa 5.8 hanggang 6.6 % AGN inflation rate noong Mayo.

Gayunman, ang pagtaas ng presyo ay magmumula sa mas mahal na bigas, gulay at iba pang pangunahing pagkain gayundin ang pagtaas ng liquefied petroleum gas at singil sa kuryente.

Samantala, nakatakda namang ilabas ng philippine statistics authority sa Hunyo 6 ang opisyal na inflation rate report para sa Mayo.

Nanawagan sa National Water Resources Board ang Metropolitan Waterworks and Sewerage System-Corporate Office, na panatilihin at huwag nang bawasan ang alokasyon ng tubig sa Angat dam na nagsusuplay ng tubig sa buong Metro Manila.

Ayon kay MWSS Division Manager Engineer Patrick Dizon, hindi na dapat baguhin hanggang sa Hunyo ang inilaang alokasyon ng tubig upang walang lugar sa Metro Manila ang makaranas ng mahabang pagkaantala sa suplay ng tubig.

Sinabi ni Engr. Dizon, na tumataas ang demand sa tubig ng mga konsyumer ng Manila Water at Maynilad kung saan, dapat ding maging responsable sa paggamit ng tubig ang publiko lalo’t pinangangambahan ang pagtama ng El Niño phenomenon ng bansa.

Nilinaw naman ni DM Dizon, na nakatakdang magsagawa ng pagpupulong ngayong araw, ang mga tauhan NWRB, upang pag-aralan kung ibababa o itataas ang kasalukuyang 52 cubic meters per second na alokasyon ng tubig.

Nabigla ang mga miyembro ng Partido Demokratiko Pilipino–Lakas ng Bayan sa biglaang pagbitiw sa puwesto ni Sen. Robin Padilla bilang Executive Vice President ng partido.

Sa liham na ipinadala ng senador, na may petsang May 29, 2023 nagpasya itong magbitiw sakaniyang posisyon na isang irrevocable o hindi na mababawi.

Ayon kay PDP-Laban President at Palawan 2^nd District Rep. Jose Alvarez, nagulat ang buong miyembro ng partido sa biglaang pagbitiw ng senador.

Sinabi ni Cong. Alvarez, na naiintindihan nila ang desisyon ni Sen. Padilla dahil posibleng abala ang mambabatas sa sunud-sunod na pagdinig sa senado kung saan, halos hindi na ito nakadadalo sa pagpupulong ng PDP-Laban.

Hindi naman binanggit kung ano ang dahilan ng pagbitiw ng senador pero mananatili pa rin itong miyembro ng partido.

Matatandaan na irrevocable resignation din ang ginawa ni Vice President Sara Duterte-Carpio bilang Chairman ng partido Lakas-CMD matapos tanggalin bilang Senior Deputy Speaker ang dating pangulo at ngayo’y Pampanga 2^nd District Rep. Gloria Macapagal-Arroyo.

Lusot na sa ikatlo’t huling pagbasa sa senado ang Senate Bill 2020 na lilikha sa Maharlika Investment Fund (MIF)

Inaprubahan sa botong 19-1-1 ng mga senador ang nasabing panukala dakong 12:30 am  matapos ang halos 12 hours na debate sa plenaryo at sertipikahan bilang urgent.

Tumutol sa panukala si Senador Risa Hontiveros habang nag-abstain si Senador Nancy Binay habang wala sa botohan sina Senators Imee Marcos, Chiz Escudero at Koko Pimentel.

Sa inaprubahang bersyon, tinanggal ang probisyon na nagpapahintulot sa mga government financial institutions at government owned and controlled corporations na mag-invest sa MIF Bill.

Ito’y sa kabila ng mga mosyon nina Senators Ronald Dela Rosa, Raffy Tulfo at Pia Cayetano na amyendahan at ilagay ang probisyon na titiyak na hindi magagalaw ang pension funds ng mga government at private sector employees.

Nakasaad sa probisyon ang phrase o kataga na ipagbabawal ang pag-i-invest ng G.S.I.S., S.S.S.., PhilHealth, OWWA, PVAO at Pag-ibig sa M.I.F., mandatory man ito o boluntaryo.

Samantala, magsasagawa ng BI-CAM Conference Committee meeting mamayang 11 a.m.  kung saan magiging kinatawan ng BI- CAM panel sina Senators Mark Villar, Pia Cayetano, Bato Dela Rosa, Sherwin Gatchalian, Francis Tolentino, Alan Peter Cayetano at Pimentel sa panig ng senado.

Nilinaw ng Department of Foreign Affairs na walang kinalaman ang ipinatupad na entry ban ng Kuwaiti government sa nangyaring aksidente sa labinlimang Pilipino bikers sa nasabing bansa.

Matatandaang nabangga ng isang SUV ang mga Pilipinong siklista kung saan, sinagot ng gobyerno sa Kuwait, ang mga gastusin sa ospital ng mga sugatang biktima.

Ayon kay Foreign Affairs at Migrant Workers Affairs USec. Eduardo de Vega, walang matibay na ebidensya at hindi dapat iniuugnay ang kasalukuyang isyu ng kuwaiti government, sa pagtigil sa pag-iisyu ng panibagong visa sa mga new entry at working visa.

Hindi rin ikinukunsiderang hate crimes ang nangyari sa mga Pinoy bikers dahil kultura na ng Kuwaiti citizens na hindi magustuhan ang mga cyclist o bikers sa kalsada kung saan, marami nang ganitong uri ng insidente sa mga biker kahit hindi mga Pilipino.

Sa kabila nito, tiniyak ni USec. de Vega, ang mga ayudang matatanggap mula sa OWWA at DMW ng mga naaksidenteng OFW.

Handa na ang Philippine Charity Sweepstakes Office (PCSO) sa pamamahagi ng relief goods para sa mga maaapektuhan ng bagyong Betty.

Kasunod na rin ito ng kautusan ni Pangulong Ferdinand Marcos Jr. na ang lahat ng ahensya sa gobyerno ay dapat na maghanda para sa pagtulong sa mga lugar na maaapektuhan ng typhoon.

Ayon kay PCSO General Manager Mel Robles, inatasan niya ang mga branch office at Small Town Lottery Authorized Agency Centers (STL-AACS) sa Northern Luzon na maghanda para sa pamamahagi ng tulong para sa mga pamilyang maaapektuhan ng bagyo.

Nauna nang naghanda ang PCSO Main Office sa Mandaluyong City ng libu-libong food packs bukod sa mga sako ng bigas at relief goods na nakaposisyon sa mga sangay nito sa Cagayan at Benguet; at STL-ACCS sa Baguio, Pangasinan, Cagayan, Ilocos Norte, La Union, Kalinga at Olongapo.

Sa pamamagitan ng kanilang medical assistance program, ang ahensya ay nagbibigay ng tulong medikal sa mga indibidwal na nasugatan o naospital sa panahon ng kalamidad.

Samantala, ang PCSO ay naglalaan ng mga pondo para sa kalamidad upang tulungan ang mga apektadong komunidad upang tulungan silang makabangon pagkatapos sa epekto ng bagyo.

Ang mga relief initiatives ng PCSO ay bilang pagtupad sa mandato nito bilang pangunahing charitable arm ng gobyerno.

Nagpaalala ang Philippine Health Insurance Corporation (PHILHEALTH) sa publiko laban sa pagkakaroon ng mataas na presyon o altapresyon lalo na ngayong tag-init.

 Kaugnay ito sa pagdiriwang ng hypertension awareness month ngayong buwan ng Mayo.

 Ang altapresyon ay ang labis na pagtaas ng blood pressure na dumadaloy sa mga ugat ng isang tao o kapag ito ay umabot o mas mataas sa 140/90 millimeters of mercury. Ang mga maaaring dahilan nito ay edad, namana sa magulang, at Poor Plifestyle

 Binigyang-diin ni Philhealth President at CEO Emmanuel R. Ledesma, Jr., ang kahalagahan ng Philhealth konsultasyong sulit at tama o konsulta package, ang pinalawak na primary care benefit para sa lahat ng filipino.

 Layunin ng PhilHealth konsulta na maagang makita ang anumang karamdaman at maagapan ang paglala ng sakit gaya ng hypertension.  Kasama sa paketeng ito ang konsultasyon, health screening, laboratory at mga gamot,” paliwanag ni Ledesma.

Hinikayat din ni Ledesma na magparehistro at gamitin ang benepisyo ng philhealth konsulta “upang makaiwas sa mas magastos na gamutan bunga ng paglala ng kondisyon ng pasyente sa mga sakit na maaari namang maagapan gaya ng mataas ng presyon ng dugo.

Ang lahat ng miyembro ng PhilHealth ay maaaring magparehistro sa mapipiling konsulta provider sa pamamagitan ng self o assisted registration.

Nananatili o halos hindi gumalaw ang presyo ng mga pangunahing bilihin sa merkado partikular na ang gulay sa gitna ng posibleng epekto ng bagyong Betty.

 Batay sa listahan ng Department of Agriculture walang naging paggalaw sa presyo ng gulay sa Metro Manila kung saan, ang carrots, ampalaya, repolyo, at sitaw ay nananatili sa 60 pesos kada kilo.

 Mabibili naman sa halaga P70 per kilo ang patatas; P40 ang kada kilo ng sayote; P50 sa kada kilo ng pechay; habang P35 naman ang per kilo ng kamatis.

 Sa pag-iikot naman ng DWIZ, sa marikina public market, mula sa dating P156 kada kilo ng manok, bumaba na ito sa P140; habang naglalaro naman sa P260 hanggang P290 ang kada kilo ng baboy.

 Nasa P160 naman ang halaga sa kada kilo ng sibuyas; P90 sa kada kilo ng bawang; P50 ang kada kilo ng talong; P10 ang kada tali ng kangkong at talbos; habang makakabili rin ng kada-supot ng siling pula at berde sa halagang P10 –P 20.

 Sa Pasig city public market, pagdating sa presyo ng isda, nagkakahalaga naman ng P150 ang per kilo ng bangus; P110 sa kada kilo ng tilapia; P160 sa kada kilo ng galunggong; P50 ang kada ¼ ng maliliit na isdang tawilis; habang P240 naman ang per kilo ng mackerel.

Maaari ding makabili ng alimasag na nagkakahalaga ng P250 kada kalahating kilo; habang nasa P90 – P120 naman ang kada ¼ ng hipon.

Pinag-aaralan na ng pamahalaan ang pagbili ng mga submarine na magagamit sa mga operasyon ng Philippine Navy.

Ayon kay Philippine Navy Chief of Naval Staff-Rear Admiral Jose Ma. Ambrosio Ezpeleta, pinag-iisipan pa nilang maigi ang pagbili ng karagdagang mga sasakyang pandagat kung saan, isinailalim na nila sa pagsasanay ang kanilang mga tauhan.

Sinabi ni Admiral Ezpeleta, na nagpadala sila ng mga tauhan sa ibang bansa upang mapag-aralan kung paano magpatakbo, mag-alaga at mag-maintain ng isang submarine.

Binigyang diin ng Navy Chief, na mahigit sampung taon na ang nakalipas nang magsimulang magplano ang navy sa pag-procure ng submarine dahil kailangan nito ng malalimang pagpaplano.

Bukod pa dito, mahal din ang presyo ng submarine at hindi gaanong kadali ang pag-ooperate nito.

Sa ngayon, patuloy na nakatatanggap ng mga alok mula sa ibat-ibang mga bansa ang pamahalaan para sa pagbili ng mga submarine.