Angelica Doctolero

Nananatili o halos hindi gumalaw ang presyo ng mga pangunahing bilihin sa merkado partikular na ang gulay sa gitna ng posibleng epekto ng bagyong Betty.

 Batay sa listahan ng Department of Agriculture walang naging paggalaw sa presyo ng gulay sa Metro Manila kung saan, ang carrots, ampalaya, repolyo, at sitaw ay nananatili sa 60 pesos kada kilo.

 Mabibili naman sa halaga P70 per kilo ang patatas; P40 ang kada kilo ng sayote; P50 sa kada kilo ng pechay; habang P35 naman ang per kilo ng kamatis.

 Sa pag-iikot naman ng DWIZ, sa marikina public market, mula sa dating P156 kada kilo ng manok, bumaba na ito sa P140; habang naglalaro naman sa P260 hanggang P290 ang kada kilo ng baboy.

 Nasa P160 naman ang halaga sa kada kilo ng sibuyas; P90 sa kada kilo ng bawang; P50 ang kada kilo ng talong; P10 ang kada tali ng kangkong at talbos; habang makakabili rin ng kada-supot ng siling pula at berde sa halagang P10 –P 20.

 Sa Pasig city public market, pagdating sa presyo ng isda, nagkakahalaga naman ng P150 ang per kilo ng bangus; P110 sa kada kilo ng tilapia; P160 sa kada kilo ng galunggong; P50 ang kada ¼ ng maliliit na isdang tawilis; habang P240 naman ang per kilo ng mackerel.

Maaari ding makabili ng alimasag na nagkakahalaga ng P250 kada kalahating kilo; habang nasa P90 – P120 naman ang kada ¼ ng hipon.

Pinag-aaralan na ng pamahalaan ang pagbili ng mga submarine na magagamit sa mga operasyon ng Philippine Navy.

Ayon kay Philippine Navy Chief of Naval Staff-Rear Admiral Jose Ma. Ambrosio Ezpeleta, pinag-iisipan pa nilang maigi ang pagbili ng karagdagang mga sasakyang pandagat kung saan, isinailalim na nila sa pagsasanay ang kanilang mga tauhan.

Sinabi ni Admiral Ezpeleta, na nagpadala sila ng mga tauhan sa ibang bansa upang mapag-aralan kung paano magpatakbo, mag-alaga at mag-maintain ng isang submarine.

Binigyang diin ng Navy Chief, na mahigit sampung taon na ang nakalipas nang magsimulang magplano ang navy sa pag-procure ng submarine dahil kailangan nito ng malalimang pagpaplano.

Bukod pa dito, mahal din ang presyo ng submarine at hindi gaanong kadali ang pag-ooperate nito.

Sa ngayon, patuloy na nakatatanggap ng mga alok mula sa ibat-ibang mga bansa ang pamahalaan para sa pagbili ng mga submarine.

Nangunguna ang Pilipinas sa mga bansang may pinakamataas na bilang ng mga Pilipino may sirang ngipin.

Ito ang naging pahayag ng Department of Health kung saan, pinakamarami dito ang mga kabataan.

Ayon kay Dr. Manuel Vallesteros, Chief ng Child Adolescent and Maternal Health Division, Disease Prevention and Control Bureau, ng DOH, 73M Pilipino ang hindi maayos ang kundisyon ng mga ngipin at hindi nache-check o nakikita ng mga dentista na itinuturing bilang isang silent epidemic.

Sinabi ni Dr. Vallesteros, na isa sa mga posibleng dahilan kung bakit tumataas ang bilang nito ay ang kakulangan sa impormasyon sa tamang pangangalaga ng mga ngipin.

Nabatid na 50% sa naturang bilang ang may sakit sa gilagid, 40% naman ang hindi pa nakapag-pacheck-up sa dentista bunsod ng kakulangan sa access ng mga naninirahan sa geographically isolated and disadvantaged areas.

Nilinaw ni Dr. Vallesteros na bahagi ng pangkalahatang pangkalusugan ng isang tao ang oral health at dapat itong seryosohin ng publiko.

Dahil dito, target ng DOH na magkaroon ng isang dentista sa bawat munisipyo sa buong bansa.

Humingi na ng tulong sa hukuman ang isa sa mga suspek sa pagpatay kay Negros Oriental Governor Roel Degamo at siyam na iba pa.

Nabatid na naghain ng petisyon na “habeas corpus” sa Regional Manila Regional Trial Court ang suspek na si Joven Javier sa pamamagitan ng kaniyang Legal Counsel na si Atty. Danny Villanueva.

Ito’y kasunod ng pag-atras ni Javier sakaniyang naunang testimonya na nagdidiin kay Congressman Arnolfo Teves Jr. kaugnay sa Degamo slay case.

Batay sa inihaing petisyon, nakapaloob dito na nanganganib ang buhay ng suspek na si Javier matapos madiskubreng may nagpaplanong ipapatay siya sa pamamagitan ng pekeng senaryo na tumakas o nag-amok siya sa loob ng bilangguan.

Nilinaw din ng kampo ni Javier na wala pang naisasampang kaso laban sa kaniya kaya walang batayan para siya ay ikulong.

Muling iginiit ni Javier na dapat siyang palayain kung saan, ipinasok siya sa Witness Protection program, kahit wala siyang nagawang krimen.

Bago ang sine die (si-ne-je) adjournment, dalawa pang panukala ang prayoridad na isabatas ni Pangulong Ferdinand Marcos Jr. at ng Legislative-Executive Development Advisory Council o LEDAC ang ipapasa ng kamara.

Tiniyak ni House Speaker Martin Romualdez na ihahabol nila ang pagpasa sa panukalang Philippine Salt Industry Development Act at Bureau of Immigration Modernization Act.

Ayon kay Speaker Romualdez, layunin ng Philippine Salt Industry Development Act na buhayin ang naghihingalong industriya ng asin sa bansa at mabawasan ang pag-angkat nito.

Malapit na anya nilang matapos ang pagpasa sa lahat ng priority measures dahil na rin sa sipag at tiyaga ng mga kongresista.

Kapag naaprubahan ng kamara sa ikatlo at huling pagbasa ang mga nabanggit na panukala ay tatlumpu na sa apatnapu’t dalawang prayoridad ng LEDAC ang natapos ng kamara wala pang isang taon mula ng manungkulan si Romualdez.

Nilagdaan na ni Pangulong Ferdinand “Bong bong” Marcos Jr., ang Executive Order No. 28 na bubuo sa Inter-Agency Committee para tutukan ang inflation sa bansa.

Layunin nitong mapahusay ang ibat-ibang hakbangin ng pamahalaan na magpapaangat, magpapalakas, at magpapaganda sa ekonomiya ng Pilipinas.

Ayon sa Presidential Communications Office, magsisilbing advisory body sa economic development group ang inter-agency committee on inflation and market outlook na magbabantay sa inflation partikular na sa pagkain at enerhiya.

Nakapaloob din sa EO, ang pag-reorganized at pagpapalit ng pangalan ng economic development cluster bilang edge upang masiguro ang economic growths, mapanatili ang halaga ng mga produkto at serbisyo, maging ang kalidad ng buhay ng mga Pilipino.

Matatandaang lumago sa 6.4 percent ang gross domestic product o ang halaga ng mga produkto at serbisyo sa Pilipinas, mula Enero hanggang Marso ng kasalukuyang taon.

Nangangamba ang ilang mga vegetable vendor at supplier sa epektong dala ni bagyong Betty sa Luzon area.

Ito’y dahil kahit humina na ang naturang bagyo, malawak parin ang epekto nito kung saan, posibleng ipatupad ang signal no. 2 at 3 sa ilang lugar sa bansa kung mananatili ito sa loob ng Philippine Area of Responsibility hanggang sa araw ng sabado at linggo.

Ayon sa mga tindera ng gulay, posibleng humina ang kanilang benta dahil sa banta ng bagyong Betty kung saan, pahirapan sa pagluwas mula sa mga probinsya ang mga gulay na nakatakdang ibenta sa mga pamilihan sa Metro Manila.

Matatandaang posibleng tumama si bagyong Betty sa Hilagang bahagi ng Luzon, kung saan, maaaring maaantala ang biyahe ng mga gulay dahil sa masamang panahon.

Aminado ang mga vendor na pahirapan sila sa suplay ng mga gulay kung saan, lalong nagiging mahal ang presyo nito tuwing may bagyo.

Bukod pa dito, mabilis ding nabubulok ang mga gulay sa panahon ng tag-ulan.

Mayorya ng mga filipino o 69% ang nagsabing nahihirapan silang maghanap ng trabaho ngayong panahon.

Batay ito sa Social Weather Stations (SWS) survey noong unang quarter ng taon.

Sa naturang survey, 11 % ang nagsabing madali ang paghahanap ng trabaho ngayon habang 16 percent ang alanganin at 4 %ang walang reaksyon.

Ipinunto rin ng SWS Sa survey results na mahirap na ang paghahanap ng trabaho simula pa noong 2011.

Samantala, 50% naman ang naniniwalang mas marami pang trabahong magiging available sa susunod na isang taon.

Hinahanapan ng ebidensya ni Dating Presidential Spokesperson Atty. Harry Roque, ang mga suspek sa degamo slay case matapos umatras sa kanilang naunang salaysay.

Matatandaang sinabi ng mga suspek na sila’y tinorture at pinagbantaan ng mga tauhan ng Philippine National Police, para idiin sa kaso si Congressman Arnolfo Teves Jr.

Ayon kay Atty. Roque, dapat depensahan ng mga suspek ang kanilang naging testimonya at ipakita ang mga ebidensya kung totoo ba na sila’y tinorture ng mga pulis.

Iginiit pa ng dating opisyal na maituturing na isang uri ng krimen ang alegasyon ng mga suspek laban sa PNP.

Nilinaw ng Philippine Competition Commission na wala silang balak magtakda ng cap sa bilang ng mga motorsiklo na papayagang maging motorcycle taxi.

Ito ang inihayag ng PCC sa joint hearing ng senate committee on public services at local government na tumalakay sa panukalang i-regulate at gawing legal ang motorcycles-for-hire para matiyak ang kanilang kaligtasan, maging epektibo at abot-kayang uri ng pampublikong transportasyon.

Ayon kay PCC Executive Director Kenneth Tanate, malaking tulong kung mahihikayat ang mas marami pang players na pumasok sa lumalaking motorcycle taxi industry, na pakikinabangan ng mga commuter.

Sa kasalukuyan, 45,000 palang ang motorcycle for hire na bumibiyahe sa mga lansangan sa metro manila, kabilang na dito ang angkas, joyride at move it kung saan, plano ng dotr na isama ang grab.

Suportado naman ni Senate Committee on Public Services Chairman Senator Grace Poe, ang pagsasalegal ng motorcycles-for-hire na magbibigay ng mas maraming opsyon sa mga pasahero para sa mas mabilis na paraan ng transportasyon.